Në Egjipt të hënën: Hamasi t’i përgjigjet propozimit për armëpushim

Një delegacion i lëvizjes palestineze Hamas do të udhëtojë nesër në Egjipt për të paraqitur përgjigjen e tij ndaj propozimit të fundit izraelit për një armëpushim në Rripin e Gazës dhe lirimin e pengjeve, thanë burime pranë Hamasit.

Delegacioni, i kryesuar nga Khalil al-Haya, një anëtar i degës politike të Hamasit në Gaza dhe i përfshirë thellësisht në negociata, do të takohet me drejtorin dhe përfaqësuesit e shërbimit inteligjent të Egjiptit për të diskutuar dhe për të dhënë një përgjigje, thanë të njëjtat burime.

Hamasi njoftoi të shtunën se kishte marrë propozimin e Izraelit të ndërmjetësuar nga Katari dhe Egjipti.

Delegacioni duhet të diskutojë gjithashtu propozimin e ri egjiptian, tha një zyrtar i lartë i paidentifikuar i lëvizjes palestineze.

Egjipti, Katari dhe Shtetet e Bashkuara po përpiqen të bindin Izraelin dhe Hamasin që të ndalojnë luftimet pas një armëpushimi njëjavor që përfundoi më 1 dhjetor, i cili lejoi lirimin e 80 pengjeve izraelitë dhe 240 të burgosurve palestinezë nga burgjet izraelite.

Lufta filloi më 7 tetor me një sulm të Hamasit në Izraelin jugor që rezultoi në vdekjen e të paktën 1,160 njerëzve, kryesisht civilë.

Sipas Izraelit, në atë kohë u rrëmbyen rreth 250 njerëz. Disa prej tyre janë shkëmbyer me të burgosur palestinezë, ndërsa rreth 130 janë ende në Gaza dhe më shumë se 30 besohet se kanë vdekur.

Nga ana palestineze, 34,454 njerëz vdiqën.