Sijarto: Bllokimi bullgar për RMV-në në BE – i tmerrshëm!

Bashkimi Evropian duhet ta pranojë se ka nevojë për Ballkanin Perëndimor dhe se rajoni e ka vendinnë BE që do të thotë se, zgjerimi i unionit duhet të përshpejtohet menjëherë, porositi sot nga Shkupi ministri i Jashtëm i Hungarisë, Peter Sijarto, përcjell KlanM.

Ai tha se, negociatat Negociatat me Maqedoninë e Veriut duhet të fillojnë menjëherë dhe të përfundojnë sa më shpejtë të jetë e mundur, duke shprehur keqardhjen e tij se, ende ka disa vende anëtare që pengojnë dhe ngadalësojnë këtë proces dhe për të kjo është e tmerrshme.

“Posaçërisht në këtë kohë, kjo është kontradiktore me interesat e BE-së. Ata të cilët e bllokojnë fillimin e këtyre negociatave, ata duhet të dinë se e minojnë edhe kredibilitetin e Bashkimit Evropian. Kur të marrim presidencën me Bashkimin Evropian do t’i lëkundim të gjithë gurët që të sigurohemi se anëtarësimi i Maqedonisë së Veriut dhe i gjithë Ballkanit Perëndimor do të ndodhë sa më shpejtë të jetë e mundur”, deklaroi Peter Sijarto, ministri i Jashtëm i Hungarisë.

Ndërkaq, ministri i Jashtëm, Bujar Osmani bëri thirrje për unifikim rreth idesë evropiane dhe të sigurohemi që pas kaq vitesh pritje, të mos krijohet më ngërç në procesin e anëtarësimit në BE, në momentin kur ai në fakt po përshpejtohet për shkak të rrethanave gjeopolitike.

“Ajo që mungon për momentin për përshpejtimin e anëtarësimit tonë në BE janë ndryshimet kushtetuese, për çka edhe një herë bëj thirrje opozita të mos hedh poshtë këtë mundësi të vetme që është para nesh”, tha Bujar Osmani.

I pyetur rreth ekstradimit të ish kryeministrit, Nikolla Gruevski i cili vite më parë u arratis në Budapes dhe Hungaria i dha azil politik, shefi i diplomacisë hungareze tha se kjo temë nuk është çështje e politikës së jashtme.

“Ajo nuk është çështje e politikës së jashtme. Ne nuk mund të ndërhyjmë në proceset gjyqësore dhe për këtë, nuk folëm konkretisht për atë në takimin e sotëm dhe vlerësoj se nuk është e nevojshme të flasim për atë”, tha Sijarto.

Ndërsa, Osmani tha se mbetet në qëndrimin që, Gruevski duhet të kthehet në vend dhe të përballet me drejtësinë.