Departamentet e policisë në SHBA u bëjnë thirrje lojtarëve që krimet e GTA 6 t’i mbajnë brenda videolojës

Policia në qytetet amerikane ka nisur të publikojë paralajmërime në rrjetet sociale për lojtarët e Grand Theft Auto VI, duke u bërë thirrje të mos ngatërrojnë botën kriminale imagjinare të lojës me sjelljen në jetën reale, ndërsa entuziazmi për videolojën e shumëpritur po arrin kulmin, transmeton Anadolu.

Departamentet e policisë publikuan paralajmërime me tone humoristike për t’u kujtuar lojtarëve se veprime të tilla si vjedhja e makinave, garat në rrugë, ngasja e rrezikshme dhe dhuna përbëjnë vepra penale në jetën reale.

Departamenti i Policisë së Atlantës deklaroi: “GTA nuk është vend i vërtetë, por Atlanta po!”, duke u bërë thirrje banorëve të mos ngatërrojnë argëtimin virtual me vendimet në jetën reale.

“Drejtimi i automjetit në gjendje të dehur, ngasja e rrezikshme, vjedhja e makinave dhe dhuna kanë pasoja reale. Mbajini brenda lojës. Mos i sillni në rrugët tona”, thuhet në deklaratë.

Departamenti i Policisë së Auroras, në Kolorado, theksoi dallimet mes shtetit imagjinar Leonida, ku zhvillohet loja, dhe shtetit perëndimor të Kolorados, duke u kujtuar lojtarëve se vjedhja e makinave, grabitja e dyqaneve dhe sulmet ndaj personave mbeten vepra penale.

Departamenti bëri gjithashtu një shaka duke theksuar se, ndryshe nga loja, policia në botën reale nuk përdor një sistem me gjashtë yje për nivelin e kërkimit të të dyshuarve, duke shtuar se edhe një yll i vetëm mund të përfundojë me pranga.

Edhe policia e Denverit, në Kolorado, u bëri thirrje lojtarëve që të gjitha aktivitetet e vjedhjes së makinave t’i mbajnë brenda lojës, duke paralajmëruar se vjedhja e automjeteve dhe ikja nga policia mbeten të paligjshme.

“Të luani GTA 6 nga divani juaj është shumë e mirëpritur. Ne do të kujdesemi për rrugët reale, ndërsa ju për ato virtuale”, thuhet në deklaratë.

Në Florida, Departamenti i Policisë së Port St. Lucie iu bashkua kësaj nisme me paralajmërime kundër trajtimit të rrugëve lokale si pista garash apo përpjekjeve për të vjedhur automjetet e policisë.

Ai u kujtoi gjithashtu lojtarëve se jeta reale nuk ka buton për t’u rikthyer në lojë pas vdekjes dhe se vendimet kanë pasoja reale.

Departamenti i Policisë së San Juanit, në Teksas, u tha lojtarëve se “ajo që ndodh në GTA 6, mbetet në GTA 6”, duke i inkurajuar ta shijojnë lojën pa i sjellë aktivitetet kriminale imagjinare në komunitetet e tyre.

– GTA VI pritet me sukses komercial
Paralajmërimet vijnë në një kohë kur GTA VI, e zhvilluar nga Rockstar Games, ka ngjallur interes të jashtëzakonshëm komercial pas daljes së saj në mbarë botën të enjten.

Platforma analitike Sensor Tower vlerësoi se loja gjeneroi 2,36 miliardë dollarë të ardhura nga porositë paraprake dhe shitjet në ditën e lançimit, me 24,58 milionë kopje të shitura deri të enjten në mbrëmje.

Shifrat përfshijnë blerjet paraprake dhe shitjet në ditën e lançimit. Rockstar Games dhe kompania e saj mëmë, Take-Two Interactive, ende nuk i kanë publikuar shifrat zyrtare të shitjeve, megjithëse kërkesa është përshkruar si “e paprecedentë”.

E disponueshme për PlayStation 5 dhe Xbox Series X|S, GTA 6 shënon pjesën e parë kryesore të serisë që nga publikimi i Grand Theft Auto V në vitin 2013, duke i dhënë fund një pritjeje 13-vjeçare për fansat.

App Icon
TetovaSot App
Shkarkoje tani nga playstore!
Instalo