SHBA/ Mbi 15 mijë lodra për fëmijë tërhiqen nga tregu për shkak të rrezikut serioz të dëmtimeve

Mbi 15 mijë lodra të buta për fëmijë janë tërhequr nga tregu në Shtetet e Bashkuara, pasi përmbajnë rruaza uji që mund të zgjerohen nëse gëlltiten, duke shkaktuar rrezik mbytjeje ose bllokimi të zorrëve, sipas https://www.foxbusiness.com/.

Komisioni i Sigurisë së Produkteve të Konsumatorit në SHBA (CPSC) njoftoi dy tërheqje nga tregu, që prekin rreth 8 000 lodra “Squeezy Dumplings” nga GIHNJSI dhe rreth 7 200 lodra “Rainbow Mystery Squishy Bun” nga OKK Trading.

Sipas autoriteteve amerikane, rruazat e ujit që ndodhen brenda lodrave mund të zmadhohen pasi gëlltiten, duke shkaktuar dhimbje të forta, të vjella, dehidratim, bllokim të zorrëve dhe, në raste të rënda, rrezik për jetën.

Lodrat, të cilat kanë formë topthash të tejdukshëm dhe përmbajnë fytyra vizatimore, shkëlqim dhe rruaza uji, shkelin standardet federale të detyrueshme të sigurisë për lodrat.

“Squeezy Dumplings” janë shitur online në Amazon gjatë muajve maj dhe qershor, për rreth 20 dollarë. Në etiketë shfaqen mbishkrimet “SQUEEZY DUMPLINGS” dhe “SQUEEZE ME”.

Ndërkohë, “Rainbow Mystery Squishy Bun” janë shitur përmes shitësve të ndryshëm të palëve të treta në të gjithë SHBA-në, nga maji deri në gusht. Në pjesën e përparme të paketimit janë të shënuara fjalët “Rainbow MYSTERY” dhe “SUGAR EDITION”.

Autoritetet u bëjnë thirrje konsumatorëve që t’i ndalojnë menjëherë përdorimin e këtyre lodrave dhe të kontaktojnë kompanitë përkatëse për rimbursim të plotë. Për të përfituar rimbursimin, konsumatorët duhet të shënojnë fjalën “RECALLED” në lodër dhe në paketim, ta hedhin produktin dhe t’i dërgojnë kompanisë një fotografi të tij.

Këto lodra janë shitur në Amazon gjatë qershorit 2026, ndërsa mund të jenë ofruar edhe nga shitës të tjerë në internet. Deri tani, nuk janë raportuar dëmtime të lidhura me asnjë prej këtyre produkteve.