Ramiz Merko dënohet me 5.000 euro. Ja pse…

Gjyka Themelore e Strugës sot i shqiptoi ish-kryetarit të Komunës së Strugës, Ramis Merko, një gjobë prej 5.000 eurosh për vendosje të paligjshme të një pllakë përkujtimore në hyrjen e ndërtesës komunale.

Sipas akuzës, me vendosjen e pllakës ai nxiti urrejtje dhe përçarje etnike mes banorëve të Strugës, duke kryer kështu vepër penale të parashikuar në nenin 27 të Ligjit për monumente përkujtimore dhe shenja përkujtimore.

Gjykata, siç theksoi gjyqtari Jor dan Jovanov në seancën e sotme, vlerësoi se ekziston përgjegjësi e të akuzuarit për veprën penale që i ngarkohet.

– Në kontekstin e asaj që paraqiti mbrojtja, se gjoja nuk ishte e qartë kush e kishte vendosur pllakën, nga dokumentacioni i tërësishëm që është mbajtur si në procedurën kundërvajtëse ashtu edhe në këtë procedurë, del se pllaka është vendosur në ndërtesën e Komunës, të cilën e përfaqësonte i akuzuari si kryetar i atëhershëm. As në procedurën kundërvajtëse nuk ishte e kontestueshme, domethënë me vetë faktin që ai kishte dhënë urdhër për pagesën e saj, kishte pranuar se nuk ishte respektuar procedura për vendosjen e pllakës. Në provat e kësaj procedure, gjykata u udhëhoq kryesisht nga mendimi i Komisionit për parandalimin dhe mbrojtjen nga diskriminimi, ku përsëri është vërtetuar se shqetësimin e vazhdueshëm e ka shkaktuar i akuzuari si kryetar i Komunës – sqaroi gjyqtari.

Për rastin janë zhvilluar dy procedura, nga të cilat njëra ishte kundërvajtëse, por ajo lidhet me mosrespektimin e procedurës për ngritjen e shenjës përkujtimore dhe për të është lëshuar urdhërpagesë kundërvajtëse. Kjo vlen për çdo shenjë përkujtimore, përfshirë edhe ato që nuk nxisin ose ndezin urrejtje fetare apo etnike.

– Ndërsa në rastin konkret, siç e thatë, ajo mbështetet kryesisht në mendimin e Komisionit për parandalimin dhe mbrojtjen nga diskriminimi, i cili ishte paditur nga mbrojtja para Gjykatës Administrative. Kjo padia u rrëzua me vendim dhe u konfirmua nga Gjykata e Lartë Administrative, që do të thotë se mendimi është i vlefshëm dhe mbetet në fuqi. Ai është hartuar mbi bazën e mendimit të ekspertëve nga Instituti i Historisë Kombëtare, nga ku ishte kërkuar vlerësim nëse ajo që simbolizon pllaka mund të nxisë ose ndezë urrejtje fetare apo etnike – theksoi Jovanov në arsyetimin e vendimit.

Edhe pse, shtoi ai, nuk ka ardhur deri te ndonjë konflikt apo eskalim për shkak të asaj që përfaqësonte pllaka, në këtë nen – i cili është nxjerrë nga një ligj i veçantë dhe nuk është pjesë e Kodit Penal, por e Ligjit për monumente përkujtimore dhe shenja përkujtimore – është parashikuar se me vetë faktin që dikush ngre një shenjë të tillë përkujtimore apo memorial, vepra është kryer dhe nuk është e detyrueshme të ekzistojë pasojë.

Merko, nga ana e tij, në fjalën e mbylljes sot para gjykatës tha se nuk ka asnjë lidhje me vendosjen e pllakës në ndërtesën e Komunës së Strugës, por se për këtë kanë deklaruar anëtarët e Shoqatës së Pensionistëve Shqiptarë, të cilët, sipas tij, kanë pranuar se e kanë vendosur ata pllakën në ditën kur çdo vit mbajnë akademi për alfabetin shqip. Për pllakën tha se kishte mësuar nga inspektorët shtetërorë të kulturës, të cilët i kishin shqiptuar gjobë Komunës me vërejtjen se nëse gjoba paguhet nga Komuna, pensionistët do të lirohen dhe lënda do të mbyllet.

– Dita e alfabetit shqip është ditë festive dhe festohet si festë shtetërore në Republikën e Maqedonisë së Veriut. Ajo është identitet i shqiptarëve kudo që ndodhen dhe do të ishte fyerje nëse dikush ndërhyn në këtë – tha Merko para gjykatës.

Avokati i të akuzuarit, Igor Petkovski, theksoi se një tabelë identike është vendosur në komunën e Manastirit, në shtëpinë-muze të alfabetit shqip, dhe se deri tani në Manastir, që është ambient multi-etnik, nuk ka pasur asnjë problem në kuptimin e urrejtjes apo përçarjes mbi baza etnike.

Në Gjykatën Themelore të Strugës sot filloi edhe shqyrtimi lidhur me akuzën për lidhjen e një kontrati për ndriçimin e një pjese të shtratit të lumit Drini i Zi, pa pëlqim ujërrjedhës nga Ministria e Mjedisit Jetësor dhe Planifikimit Hapësinor. U dëgjuan dy nga tre dëshmitarët e parashikuar; njëri me urdhër të gjykatës do të dëgjohet në seancën e ardhshme, e cila është caktuar për 25 nëntor.

Merko ishte dënuar më parë me gjobë për emërime të paligjshme të drejtorëve në gjashtë shkolla të komunës (nga të cilat pesë janë të formës së prerë) dhe ishte shpallur i pafajshëm për blerjen e një automjeti zyrtar Audi A6.