Paralajmërimi i Danimarkës: “Rusia do të sulmojë brenda pak muajsh”
Rusia mund të nisë një sulm të kufizuar ushtarak kundër një vendi anëtar të NATO-s në muajt e ardhshëm. Kështu ka bërë me dije një raport i inteligjencës daneze, i cili është paralajmërimi më i hapur deri më tani nga shërbimet perëndimore të sigurisë.
Shërbimi i Inteligjencës së Mbrojtjes Daneze tha se ekzistonte një “rrezik i ulët, por në rritje” që Rusia të zhvendoste një numër të vogël trupash, ndoshta pa emblema, në një vend fqinj ose të përdorte armë me rreze të gjatë veprimi në infrastrukturën e përdorur për të mbështetur Ukrainën.
“Kjo mund të përfshijë vendosjen e forcave ushtarake në një zonë të kufizuar brenda vendeve të NATO-s që kufizohen me Rusinë – për shembull, nën pretekstin e mbrojtjes së pakicave lokale ruse. Qëllimi do të ishte përçarja e aleancës”.
Deklarata daneze është paralajmërimi më i qartë deri më tani në lidhje me planet e Rusisë pas një numri sulmesh “hibride”, përfshirë një sulm të dështuar me dron në aeroportin e Leipzigut në Gjermani dhe një anije ruse që qëlloi me fishekzjarrë një helikopter danez mbi Detin Baltik.
Inteligjenca daneze tha se Rusia ishte nën më shumë presion se në çdo kohë tjetër që nga nisja e pushtimit të plotë të Ukrainës në shkurt 2022. Shërbimi i inteligjencës shtoi se nuk kishte “asnjë perspektivë” që Rusia të bënte një përparim të madh në gjashtë muajt e ardhshëm.
Danezët paralajmëruan se Rusia do të intensifikojë sulmet e saj hibride kundër vendeve evropiane me “pasoja më të mëdha” për ata që janë në shënjestër, duke përfshirë “sulme kibernetike shkatërruese që dëmtojnë funksionet shoqërore, si dhe sulme sabotimi që mbartin një rrezik të lartë viktimash”.
Inteligjenca daneze tha se besonte se një pushtim në shkallë të plotë i një vendi të NATO-s nga Rusia ishte “shumë i pamundur” pasi do të duhej një grumbullim trupash për gjashtë muaj, por një skenar i tillë “nuk mund të përjashtohet”.
Inteligjenca daneze tha të enjten se ende besonte se Rusisë do t’i duheshin gjashtë muaj për të zhvilluar një luftë lokale kundër një vendi fqinj që i përket NATO-s, dy vjet për të paraqitur një kërcënim të besueshëm të një lufte rajonale dhe pesë vjet për të nisur një luftë në shkallë të gjerë në Evropë.
