Danimarka – shtëpia e dytë e Nerashtasve dhe krenaria e suksesit të tyre!

Nerashti është një nga fshatrat që e ka përjetuar më së shumti kurbetin. Sot, rreth 1.500 Nerashtas jetojnë dhe punojnë në Danimarkë, duke e bërë atë shtëpinë e tyre të dytë, pa e harruar asnjëherë vendlindjen.

Mërgata e Nerashtit nuk përfaqësohet vetëm nga punëtorë të palodhur. Ajo numëron inxhinierë, mësues, ekonomistë, sipërmarrës dhe më shumë se pesë mjekë, të cilët ushtrojnë profesionin e tyre në spitalet e Danimarkës. Ky është një tregues i qartë se puna, arsimi dhe përkushtimi i nerashtasve vlerësohen edhe në një nga shtetet me standardet më të larta në Evropë.

Me mundin dhe sakrificën e tyre, ata kanë mbështetur familjet, kanë investuar në Nerasht, kanë ndërtuar shtëpi, kanë kontribuar në zhvillimin e fshatit dhe kanë ruajtur gjallë traditat, kulturën dhe identitetin shqiptar.

Kurbeti i largoi fizikisht, por zemra e tyre vazhdon të rrahë për Nerashtin. Çdo sukses i tyre është krenari për vendlindjen dhe dëshmi se puna, dija dhe përkushtimi nuk njohin kufij.

Mërgata e Nerashtit është një pasuri e çmuar, ndërsa Danimarka mbetet vendi ku shumë ëndrra të nerashtasve janë bërë realitet.
Pedagog : Abdulla Xhaferi .