U zhduk kabllo prej 15 kilometrash me vlerë 15 mijë euro, u zbuluan edhe kontrata të dyshimta

Udhëheqësia aktuale e Institutit të Shëndetit Publik (ISHP) ka zbuluar një sërë parregullsish në funksionimin e institucionit, mes të cilave zhdukjen e një kablloje interneti me gjatësi 15 kilometra dhe vlerë rreth 15 mijë euro, si dhe mungesë dokumentacioni për pajisje të blera.

Drejtoresha e ISHP-së, Maria Andonovska, deklaroi se në institucion nuk ishte kryer auditim që nga viti 2017, ndërsa gjatë kontrolleve të brendshme janë konstatuar disa furnizime dhe kontrata të diskutueshme. Janë blerë kompjuterë, laptopë dhe telefona celularë iPhone, por për një pjesë të pajisjeve ekzistojnë vetëm kërkesat për blerje, pa procesverbale dorëzimi apo gjurmë se ku kanë përfunduar.

Ndër parregullsitë e konstatuara janë edhe kontratat për shërbime telekomunikacioni me vlera dukshëm më të larta se ato të planifikuara fillimisht. Kështu, është lidhur një kontratë për shërbime mobile në vlerë prej 1.6 milionë denarësh, ndonëse ishin planifikuar 800 mijë denarë, ndërsa për telefoninë fikse është nënshkruar kontratë prej 1.1 milionë denarësh në vend të 550 mijë denarëve të paraparë.

“Kemi konstatuar gjithashtu se për shënimin e 100-vjetorit të ISHP-së janë shpenzuar 50 mijë euro për vetëm një orë. Për çfarë mund të shpenzohen 50 mijë euro për një orë? Më tej, nëse ligji lejon që për 1.000 euro ose 62 mijë denarë të blihen mjete të caktuara pa procedurë të prokurimit publik, ata kanë shpenzuar mbi një milion denarë jashtë kufijve të lejuar. Imagjinoni, lejohen 1.000 euro, ndërsa janë shpenzuar mbi 20 mijë euro. Nga 500 mijë denarë janë dhënë për reprezentacion, krahasuar me tani kur kemi zero shpenzime për reprezentacion, nuk përdorim automjete zyrtare dhe nuk realizojmë udhëtime zyrtare. Unë nuk përdor telefon zyrtar dhe as numër zyrtar. Ekziston evidencë se kujt i jepet një pajisje dhe kush e merr në përdorim. Ekzistojnë dokumente dorëzimi dhe procedura të tjera. Janë paguar edhe shtesa të caktuara në paga në mënyrë të kundërligjshme, shpërblime, kujdestari aktive dhe pasive – gjithçka në kundërshtim me ligjin. Tani kur koeficientët janë rregulluar dhe nuk ka pagesa të paligjshme, kursehen rreth 5 milionë denarë në muaj. Sa i përket kabllos së rrjetit me vlerë 15 mijë euro, nuk dimë as ku është, as çfarë është dhe as pse është blerë”, deklaroi Andonovska.

Ajo theksoi se auditimi është kryer me kërkesë të vetë ISHP-së, ndërsa raporti me opinion të pafavorshëm është publikuar tashmë në opinionin publik.