Radev me kritika të ashpra ndaj Shkupit: Po e vonojnë vetë rrugën drejt BE-së

Presidenti bullgar Rumen Radev ka lëshuar kritika të reja ndaj udhëheqjes së RMV-së, duke thënë se autoritetet në Shkup po bëjnë gjithçka që është e mundur për të vonuar pranimin e vendit në Bashkimin Evropian. Ai tha gjithashtu se nuk sheh nevojë për një takim të ri me kryeministrin Hristijan Mickoski.

Deklarata e Radevit vjen pas miratimit të raportit të fundit të progresit për Maqedoninë e Veriut në Parlamentin Evropian, i cili thekson edhe një herë detyrimet që vendi duhet të përmbushë në kuadër të procesit evropian.

Dokumenti vë në dukje rëndësinë e Protokollit të Dytë të Marrëveshjes së Fqinjësisë së Mirë me Bullgarinë, si dhe nevojën që Komisioni i Përbashkët Historik të arrijë rezultate konkrete dhe të matshme. Përveç kësaj, thekson se ndryshimet kushtetuese mbeten një parakusht kyç për hapjen e grupit të parë në negociatat e pranimit me BE-në.

Duke iu referuar mundësisë së takimit me Mickoskin, Radev deklaroi se “nuk ka asgjë më shumë për të thënë”, duke theksuar se konsensusi i arritur në korrik 2022 duhet të respektohet plotësisht.

“Ne duhet të bëjmë edhe një herë çdo përpjekje për të bindur udhëheqësit evropianë se ajo për të cilën u ra dakord në vitin 2022 duhet të zbatohet”, tha Radev, duke shtuar se Bullgaria do të vazhdojë të këmbëngulë në respektimin e angazhimeve të marra.

Me këtë, Sofja dërgoi edhe një herë një mesazh se përfshirja e bullgarëve në Kushtetutë, zbatimi i marrëveshjeve dypalëshe dhe përparimi i komisionit historik mbeten kushte kyçe për përparimin e mëtejshëm të Maqedonisë së Veriut në rrugën drejt anëtarësimit në Bashkimin Evropian.