Lufta me Iranin i kushtoi Pentagonit 40 miliardë dollarë

Analiza paraprake e CSIS: Konflikti rriti çmimet e karburanteve, përshpejtoi inflacionin dhe i kushtoi familjeve amerikane qindra dollarë më shumë

Lufta me Iranin i ka kushtuar Pentagonit rreth 40 miliardë dollarë, sipas një analize paraprake të Qendrës për Studime Strategjike dhe Ndërkombëtare (CSIS), të cituar nga CNN. Sipas të dhënave, shifra përfshin shpenzimet për municionet, pajisjet e shkatërruara dhe dëmet në bazat ushtarake amerikane, por nuk llogarit kostot operative që ishin parashikuar tashmë në buxhetin fiskal 2026 të Departamentit të Mbrojtjes, i cili tejkalon 1 trilion dollarë.

“Vlera prej rreth 40 miliardë dollarësh mbulon kryesisht municionet, pajisjet e humbura dhe dëmet në infrastrukturën ushtarake”, tha për CNN Mark Cancian, këshilltar i lartë në CSIS.

Përveç Pentagonit, analiza vlerëson se konflikti ka gjeneruar rreth 1 miliard dollarë shpenzime shtesë edhe për institucione të tjera federale, si Departamenti i Sigurisë Kombëtare dhe Departamenti për Çështjet e Veteranëve. Pasojat janë ndjerë edhe nga konsumatorët amerikanë. Gjatë fazës më intensive të luftës, çmimi mesatar i benzinës në Shtetet e Bashkuara u rrit nga më pak se 3 dollarë për gallon në mbi 4 dollarë, duke rritur ndjeshëm kostot e jetesës.

Sipas sistemit të monitorimit të kostove të energjisë të zhvilluar nga Universiteti Brown, çdo familje amerikane ka shpenzuar mesatarisht mbi 253 dollarë më shumë sesa do të kishte paguar nëse konflikti nuk do të kishte ndodhur.