Veligdenov: Punonjësit në filialet e Postës së Maqedonisë protestojnë, më 7 qershor do të organizojnë grevë

Shkup, 22 maj 2024 (MIA) – Punonjësit në të gjitha filialet të Postës së Maqedonisë sot organizojnë protestë për të shprehur revoltën dhe shqetësimin e tyre për të ardhmen e kompanisë dhe për ruajtjen e vendeve të tyre të punës, sepse për një periudhë të gjatë është duke u përballur me krizë të madhe financiare dhe me një organizim të keq të operimit dhe me këtë është sjellë në një kaos të madh dhe në fund të ekzistencës, theksoi në konferencë për shtyp Boro Veligdenov, kryetar i organizatave sindikale të Postës së Maqedonisë.

“Nuk e dimë se kur do të paguhemi sepse nuk kemi burime të mjaftueshme financiare dhe as ekipi drejtues nuk ka përgjigje për këtë pyetje, sepse prisnin një lloj fluksi. Posta e Maqedonisë është sjellë në gjendje shkatërrimi, mbijetesa e saj është në pikëpyetje të madhe dhe kërkojmë një takim urgjent me qeverinë e re për zgjidhjen e situatës. Ajo që ne kemi kërkuar prej vitesh është që të fillojmë menjëherë dhe pa vonesë reformat e reja dhe riorganizim të përgjithshëm. Procedura për sistematizimin e vendeve të reja të punës është themeli dhe baza për stabilizimin dhe funksionimin e mëtejshëm të ndërmarrjes. Qeveria duhet të mbrojë interesin e Postës së Maqedonisë, sepse 2000 punëtorë do të mbeten në rrugë dhe ne do të jemi shembulli i vetëm në botë që një postë shtetërore nuk funksionon, gjegjësisht nuk ekziston”, theksoi Veligdenov.

Përfaqësuesit sindikalë në Postën e Maqedonisë kërkuan reforma në kompanitë që të fillojnë sa më shpejtë, me ndërmarrje të masave më serioze për stabilizim të gjendjeve.

“Të mos ketë më shumë se 15 filiale me 15 drejtorë dhe një mijë të punësuar, neve na nevojiten punonjës në procesin teknologjik që qytetarët të jenë të kënaqur nga shërbimet tona. Qeveria e ardhshme të ndërmerr masa edhe për trupin rregullator të Agjencisë për posta, e cila nga ne merr sasi të mëdha parash, kjo duhet të jetojë sipas Ligjit për shërbime postare. Kemi informacione se në vendin tonë shpëndahen dërgesa nga vendet fqinje, që është në kundërshtim me të gjitha dispozitat ndërkombëtare për trafik postar. Agjencia të ndërmerr përgjegjësi përballë operatorëve të tjerë, të cilët kryejnë dërgesë konkurrente dhe jolojale”, theksoi Sasho Dimitrievski, përfaqësuesi i Sindikatës së Postës së Maqedonisë

Në konferencën për shryp u kërkua që të ndërpritet edhe me politikat kadrovike partiake, e cila e ka shkatërruar Postën e Maqedonisë, ndërsa është paralajmëruar edhe grevë për fillimin e muajit të ardhshëm.