Arestohet punonjësi i parkingut të qytetit në Tetovë


NP Parkingu i Qytetit Tetovë, reagon ashpër për arrestimin e sotëm të një punonjësi të ndërmarrjes nga zyrtarët policorë. Punonjësi ishte ndaluar me arsyetimin se kishte fyer zyrtarin policor dhe është mbajtur në polici për më shumë se katër orë.

Gjegjësisht, sot në mëngjes, një pronar i një veture është ankuar se i është bllokuar makina për të cilën nuk kishte paguar për parkim. Për këtë rast ai ka lajmëruar policinë dhe pasi kanë mbërritur dy zyrtarë policor, punonjësi i parkingut i ka shpjeguar njërit prej tyre se për çfarë bëhej fjalë, për të cilën ka reaguar zyrtari policor për mos kryeje të detyrës si duhet, ku ka pasur edhe një debat verbal mes tyre.
NP Parkingu i Qytetit do të paraqesë ankesë deri në Sektorin për kontroll të brendshëm dhe shërbime profesionale në MPB, për ndalim të pabazuar dhe të gjatë të punonjësit të tyre dhe do të kërkojë zbardhjen e drejtë të rastit.

NP Parkingu i Qytetit vazhdon të bëjë punën e saj në mënyrë profesionale, për qarkullim më të mirë të trafikut, rregull më shumë dhe me këtë edhe kontribuon në sigurinë e qytetarëve!