Punëtorët shëndetësorë paralajmërojnë protesta masive pas zgjedhjeve


Federata Sindikale e Shëndetësisë ka paralajmëruar se pas zgjedhjeve do të ketë protesta masive nga ana e punëtorëve shëndetësorë.

Sipas FSSHK-së thuhet se këto protesta do të jenë edhe më të mëdha se ajo e datës 17 shtator kur u protestua me kërkesën për shtesat në paga dhe fillimit të plotësimit dhe miratimit të Ligjit për paga.

“Duke patur parasysh që kanë kaluar tre javë nga Protesta publike e përfaqësuesve sindikal të punonjësve të shëndetësisë, Protestë në të cilën u shpalosën kërkesat për shtesat në pagë sipas Ligjit me nr. 06/L-007 për parandalimin dhe luftimin e Pandemisë COVID-19 dhe për fillimin e procedurave të plotësimit dhe miratimit të Ligjit mbi Pagat me theks të veqantë që të futet në parashikimin e buxhetit për vitin 2022 dhe mosrespektimin absolut nga Qeveria, Federata e Sindikatave të Shëndetësisë së Kosovës në mbledhjen e mbajtur me datë 07.10.2021 PARALAJMËRONË se menjëherë pas datës 17.10.2021 pra, pas procesit zgjedhor komunal do të organizojë PROTESTËN e radhës e cila do të jetë më masovike se ajo e datës 17.09.2021”.

“Qytetarët e Republikës së Kosovës duhet ta kenë të kjartë se me qasjen aktuale të Qeverisë ndaj punonjësve shëndetësor po bëhet shkatërrimi i sistemit publik shëndetësor,gjë e cila do të sjell ndikimet e veta mbi nevojat direkte të qyetarit të RKS-së.Kërkojmë që kjo Qeveri të reflektojë sepse kuadri shëndetësor-mjek e infermier janë duke u larguar nga sistemi publik dhe nga Republika e Kosovës”.