Presidenti i Paraguajit shkarkohet nga detyra dhe arrestohet pas skandalit të bankës dixhitale

Senati votoi me 44 vota pro shkarkimit të tij, ndërsa ish-kreu i shtetit ndodhet në arrest shtëpiak. Kriza financiare preku rreth 3 milionë klientë të bankës dixhitale.

Një krizë e rëndë financiare dhe politike ka tronditur Paraguain, duke çuar në shkarkimin dhe arrestimin e presidentit Santiago Peña, pas kolapsit të bankës dixhitale Ueno, e cila kishte lidhje të mëparshme biznesi me kreun e shtetit.

Senati i Paraguait votoi me 44 vota pro dhe asnjë kundër për shkarkimin e Peña-s, ndërsa një senator mungoi në votim. Presidenti i Senatit, Basilio Núñez, deklaroi se ai u shpall fajtor për “kryerje neglizhente të detyrave”.

Pas vendimit, autoritetet vendosën ish-presidentin në arrest shtëpiak, në pritje të paraqitjes së tij përpara prokurorisë.

Sipas raportimeve të mediave ndërkombëtare, Peña po hetohet për dyshime mbi shkelje të besimit, ushtrim të ndikimit dhe keqpërdorim të fondeve. Senatorët e kanë akuzuar gjithashtu për konflikt interesi, ndërhyrje në mbikëqyrjen rregullatore dhe mbulim të parregullsive financiare që lidhen me bankën qendrore.

Peña, i cili deri në vitin 2025 zotëronte aksione në kompaninë mëmë të bankës Ueno, ka mohuar çdo shkelje. Avokati i tij, Ricardo Preda, i ka cilësuar akuzat si të pabazuara dhe oportuniste.