EL NINO, RREZIK PËR BOTËN/ Temperaturat e oqeanit pritet të arrijnë kulmin gjatë dhjetorit
El Niño po forcohet me shpejtësi dhe Organizata Botërore Meteorologjike paralajmëron se temperaturat e sipërfaqes së detit në Paqësorin tropikal mund të arrijnë nivele rekord gjatë muajve të ardhshëm. Fenomeni pritet të kulmojë në dhjetor dhe ka probabilitet shumë të lartë të vazhdojë deri në shkurt të vitit 2027. Forcimi i tij mund të ndikojë temperaturat dhe reshjet në mbarë botën.
Fenomeni El Niño po forcohet me shpejtësi dhe Organizata Botërore Meteorologjike paralajmëron se temperaturat e sipërfaqes së detit në pjesën qendrore dhe lindore të Paqësorit tropikal mund të arrijnë nivele rekord gjatë muajve tetor, nëntor dhe dhjetor.
Përditësimi më i fundit për klimën sezonale globale tregon se El Niño do të vazhdojë të intensifikohet përpara kulmit të parashikuar në dhjetor. Organizata vlerëson se ka probabilitet gati 100 për qind që fenomeni të vazhdojë deri në shkurt të vitit 2027 dhe ai mund të bëhet një nga episodet më të fuqishme të regjistruara që nga viti 1950.
Forcimi i El Niño pritet të sjellë temperatura mbi mesataren në pjesën më të madhe të globit dhe të ndryshojë modelet e reshjeve.
Kjo mund të rrisë rrezikun për thatësira në disa rajone, ndërsa në zona të tjera mund të shtojë mundësinë për reshje të dendura dhe përmbytje.
Sipas Sekretares së Përgjithshme të WMO, El Niño është vendosur fuqishëm dhe po forcohet me shpejtësi. Ajo shpjegon se fenomeni nuk krijon nxehtësi të re në planet, por çliron nxehtësinë që oqeani ka ruajtur nën sipërfaqe.
Për këtë arsye, El Niño mund të kontribuojë në regjistrimin e temperaturave shumë të larta globale.
Temperatura e sipërfaqes së detit në rajonin qendror dhe lindor të Paqësorit ekuatorial, ku matet një nga treguesit kryesorë të El Niño-s, u rrit nga 1.6 gradë Celsius mbi normalen në qershor, në 2.5 gradë mbi normalen në gusht.
Nëse ky parashikim realizohet, bëhet fjalë për vlerën më të lartë të regjistruar që nga fillimi i vëzhgimeve dhe dukshëm mbi rekordin e mëparshëm prej 2.6 gradë Celsius.
