Takimi dy orësh me Kurtin, flet Hamza: S’ka marrëveshje, për PDK është i nevojshëm ligji për Specialen pastaj presidenti
Kryetari i PDK-së, Bedri Hamza, tha pas takimit me kryeministrin Albin Kurti se aktualisht nuk ka marrëveshje, ndërsa la të hapur mundësinë që takimet ndërmjet palëve të vazhdojnë edhe në ditët e ardhshme.
“Kur të kemi marrëveshje, tregoj. Është e mundshme që të kemi takime edhe në ditët në vijim”, tha Hamza, shkruan Kp. Hamza tha se në takimin me Kurtin u diskutua për procesin që po zhvillohet në Hagë, aktgjykimin e Dhomave të Specializuara dhe nevojën për miratimin e ndryshimeve në ligjin për Gjykatën Speciale.
“Takimi ka të bëjë me procesin që është duke u zhvilluar në Hagë, me aktgjykimin e gjykatës, me nevojën që ligji i gjykatës të aprovohet në Kuvendin e Republikës, dhe tema e zgjedhjes së presidentit. Për PDK-në e dini që është nevojë aprovimi i ligjit dhe pastaj ne jemi të hapur që të diskutojmë për presidentin dhe që vendit me i dhënë president”, tha Hamza.
