Shkollat Fillore të Çairit pjesë e aksionit ekologjik të organizuar nga qyteti i Shkupit

Të gjitha shkollat fillore komunale në Çair iu bashkuan aksionit të madh ekologjik “Dil dhe bashkangjitu!”, të organizuar nga Qyteti i Shkupit, duke përfshirë nxënësit dhe stafin arsimor në aktivitetet për pastrimin dhe kujdesin ndaj mjedisit.

Në oborret e shkollave dhe hapësirat përreth tyre u realizuan aktivitete pastrimi, përmes të cilave nxënësit dhanë kontributin e tyre për një mjedis më të pastër dhe më të rregullt, duke u bërë pjesë e angazhimit të përbashkët që u zhvillua në territorin e Shkupit.

Pjesëmarrja e shkollave të Çairit në këtë aksion kishte njëkohësisht edhe karakter edukativ, duke nxitur te nxënësit ndërgjegjësimin për rëndësinë e mbrojtjes së mjedisit dhe përgjegjësinë ndaj hapësirave të përbashkëta.

Një Çair dhe një Shkup më i pastër fillon edhe nga edukimi dhe shembulli që u japim brezave të rinj.