Tensionet rriten në Gjirin Persik/ SHBA godet tre anije iraniane pas sulmit me raketa ndaj anijeve amerikane

Tensionet mes Shteteve të Bashkuara dhe Iranit janë rritur sërish në Gjirin Persik.

Forcat amerikane kanë goditur tre anije iraniane që transportonin naftë bruto, pasi Garda Revolucionare Islamike e Iranit lëshoi raketa balistike drejt dy anijeve luftarake amerikane.

Sipas Komandës Qendrore amerikane (CENTCOM), një aeroplanmbajtëse dhe një destrojer amerikan i pajisur me raketa të drejtuara shmangën disa sulme iraniane. Pas këtij incidenti, SHBA ndërmori goditjet ndaj tankerëve iranianë.

Dy prej anijeve, M/T Downy pranë ishullit Kharg dhe M/T Stark 1 pranë qytetit Jask, u nxorën përgjithmonë jashtë funksionit. Një tjetër tanker, M/T Kylo, i cili ishte bosh dhe ndodhej jashtë Gjirit Persik, u godit disa herë dhe u shkatërrua.

Ishulli Kharg është një prej pikave kryesore të eksportit të naftës së Iranit, ndaj goditja pranë tij merr rëndësi edhe për përplasjen ekonomike mes dy vendeve.

SHBA i ka lidhur këto anije me një rrjet transporti nafte që, sipas saj, ndihmon në financimin e Gardës Revolucionare dhe grupeve të armatosura të mbështetura nga Irani.

Nga ana iraniane nuk ka pasur ende një reagim zyrtar për goditjet amerikane.

Mediat shtetërore iraniane raportuan më herët se një tanker pranë ishullit Kharg ishte goditur nga katër raketa, por pa viktima.

Përplasja e fundit vjen pas një periudhe të re sulmesh mes dy vendeve dhe rrit shqetësimet për sigurinë e transportit detar në Gjirin Persik dhe në Ngushticën e Hormuzit, një nga rrugët kryesore të transportit të naftës në botë.

Sipas drejtuesit të CENTCOM, admirali Brad Cooper, SHBA do të përgjigjet me kosto më të mëdha nëse forcat iraniane vijojnë të sulmojnë anijet amerikane. Kjo e fundit është një tjetër përshkallëzim në përplasjen mes Uashingtonit dhe Teheranit.