Klubi befasues që është afër të nënshkruajë me yllin e Barçës

Marc Casadó është pranë largimit nga Barcelona këtë verë. Mesfushori ka humbur vendin në planet e Hansi Flickut te klubi katalanas, ndërsa Besiktasi po insiston fuqishëm për ta transferuar atë. Edhe disa klube të tjera janë të interesuara për të ardhmen e tij, teksa afati kalimtar po shkon drejt fundit.

Sipas gazetës spanjolle “Sport”, Besiktasi i ka shtuar përpjekjet gjatë ditëve të fundit për ta bindur Barcelonën dhe Casadon që të arrijnë marrëveshje, pasi klubi turk kishte shfaqur interesim për lojtarin që në fillim të verës.

Në krye të operacionit për klubin turk është Edvard Graf, drejtori sportiv i Besiktasit dhe ish-skaut i Borussia Dortmundit. Besiktasi i nisi negociatat duke kontaktuar agjentin e lojtarit, Jorge Mendes, përpara se të niste bisedimet me drejtorin sportiv të Barcelonës, Deco.

Barcelona fillimisht e kishte vlerësuar transferimin e Casados në rreth 20 milionë euro. Megjithatë, me afrimin e fundit të afatit kalimtar, klubi katalanas mund t’i zbusë kërkesat financiare, veçanërisht pasi ka arritur objektivat e tij për shitjet këtë verë, përfshirë edhe transferimin e Ferran Torresit te Paris Saint-Germain.

Besiktasi nuk është klubi i vetëm në garë. Leipzigu nga Gjermania i është bashkuar listës së skuadrave të interesuara, ndërsa disa klube angleze po e monitorojnë gjithashtu situatën, megjithëse nuk është e qartë nëse ndonjëri prej tyre ka bërë ofertë zyrtare.

Casadó dëshiron të transferohet te një klub evropian ku do të mund të luajë rregullisht dhe të rikthejë formën e tij, pasi roli i tij te Barcelona është zbehur ndjeshëm.

Tani Barcelona dhe Mendes po punojnë për të gjetur destinacionin e tij në ditët e fundit të afatit kalimtar.