Nvidia sfidon MacBook Pro me gjeneratën e re të laptopëve Windows 11

Gjiganti teknologjik Nvidia ka njoftuar se do të fuqizojë gjeneratën e ardhshme të kompjuterëve, duke hyrë më fuqishëm në tregun e laptopëve Windows 11.

Nvidia u bë një emër shumë i njohur pas bumit të inteligjencës artificiale, pasi kartat e saj grafike, të njohura si GPU, u bënë jashtëzakonisht të kërkuara për qendrat e mëdha të të dhënave që përdoren për AI. Kjo rriti ndjeshëm vlerën e kompanisë në treg. Para këtij suksesi, Nvidia njihej kryesisht për tregun e video-lojërave, duke shitur karta grafike për përdoruesit që ndërtonin kompjuterë të fuqishëm për gaming.

Tani, kompania po rikthehet fuqishëm në industrinë e kompjuterëve personalë me RTX Spark, çipin e parë të Nvidia-s të krijuar për laptopë konsumatorësh. Ky zhvillim është parë si i rëndësishëm, pasi Spark bazohet në teknologjinë Arm, dhe jo në arkitekturën tradicionale të përdorur nga rivalë si Qualcomm apo Intel, çipat e të cilëve fuqizojnë shumicën e laptopëve Windows 11, së bashku me AMD.

Në krijimin e RTX Spark, Nvidia është ndihmuar nga MediaTek, rivali i Qualcomm në tregun e çipave për pajisje mobile. Çipi i ri ka 20 bërthama CPU, 6,144 bërthama GPU dhe 128GB RAM, duke e bërë atë një çip jashtëzakonisht të fuqishëm për laptopë. Megjithatë, Nvidia nuk ka publikuar ende statistika konkrete të performancës apo rezultate benchmark gjatë prezantimit në Computex, panairin e teknologjisë në Taipei.

Prodhuesit e çipave për PC kanë qenë në garë për ta arritur Apple që nga viti 2020, kur kompania prezantoi çipin e saj të parë M, gjithashtu të bazuar në Arm. Apple tregoi se laptopët mund të kenë bateri që zgjat gjithë ditën dhe performancë shumë të mirë në të njëjtën kohë. Tani, Nvidia synon të tregojë se mund ta sfidojë Apple në këtë fushë.

RTX Spark pritet të përdoret në kompjuterë të rinj nga disa prej emrave më të mëdhenj të industrisë, përfshirë ASUS, Dell, HP, Lenovo, Microsoft, MSI, Acer dhe GIGABYTE.

Sipas Nvidia-s, RTX Spark është krijuar për inteligjencë artificiale, krijimtari dhe gaming, duke sjellë teknologjitë më të avancuara të kompanisë në laptopë të hollë Windows me bateri që zgjat gjithë ditën, si dhe në kompjuterë desktop të vegjël dhe shumë efikasë.

Modeli kryesor i prezantuar me këtë çip është Microsoft Surface Laptop Ultra, një pajisje që tregon bashkëpunimin e Microsoft dhe Nvidia për të rivalizuar MacBook Pro në segmentin premium të laptopëve. Megjithatë, çmimet për pajisjet me RTX Spark ende nuk janë konfirmuar.

Duke qenë se suksesi i madh i Nvidia-s lidhet me inteligjencën artificiale, nuk është befasi që RTX Spark është ndërtuar rreth AI. Microsoft, më shumë se Apple, ka investuar fuqishëm në inteligjencën artificiale përmes markës Copilot, e cila tashmë është pjesë e Windows 11. Laptopët e rinj Windows madje kërkohet të kenë një buton të veçantë Copilot në tastierë.

Nvidia premton se Spark do t’i bëjë laptopët Windows më të integruar me mjetet e inteligjencës artificiale që përdoruesit tashmë po i përdorin çdo ditë.

“The PC is being reinvented”, tha Jensen Huang, themeluesi dhe drejtori ekzekutiv i Nvidia-s. Sipas tij, për dekada përdoruesit kanë hapur aplikacione, kanë klikuar dhe kanë shkruar, ndërsa me RTX Spark dhe Windows, kompjuteri do të punojë më shumë përmes kërkesave direkte të përdoruesit. Ai e përshkroi këtë si “kompjuterin e ri personal të inteligjencës artificiale”.

Laptopët e parë me RTX Spark pritet të dalin më vonë gjatë vjeshtës. Fillimisht do të jenë gjashtë pajisje premium nga Asus, Dell, HP, Lenovo, MSI dhe Microsoft, ndërsa më vonë gama pritet të zgjerohet në rreth 30 laptopë dhe 10 mini-kompjuterë desktop.

Përveç Microsoft Surface Laptop Ultra, Dell prezantoi modelin e ri XPS 16, ndërsa Asus solli ProArt P16 dhe ProArt P14.

Tani mbetet të shihet sa do të kushtojnë këto pajisje. Apple shet MacBook Air për 1,099 funte, që aktualisht është laptopi më i lirë me çip të serisë M, ndërsa çipat e së njëjtës familje gjenden edhe në iPad Air, i cili nis nga 599 funte.