Kroacia gati për Botërorin

Kroacia ka dëshmuar prej kohësh se nuk është një skuadër që mund të nënvlerësohet në Kupën e Botës. Edhe pse trofeu i madh ende i mungon, rezultatet e saj në turnetë e fundit flasin qartë.

Pas përfundimit në treshen më të mirë në dy Botërorët e fundit, kroatët zhvilluan një fushatë kualifikuese pa humbje, duke fituar shtatë nga tetë ndeshjet për të siguruar pjesëmarrjen në finalet që do të mbahen në Shtetet e Bashkuara, Meksikë dhe Kanada.

Skuadra ka humbur disa lojtarë të rëndësishëm vitet e fundit për shkak të tërheqjeve nga kombëtarja, ndërsa disa nga yjet e saj më të njohur tashmë janë përtej viteve më të mira të karrierës. Megjithatë, me Luka Modrićin legjendar që vazhdon të tregojë se mund të luajë në nivelin më të lartë, ekipi i Zlatko Dalićit pritet të jetë një kundërshtar shumë i vështirë.

Kroacia është shortuar në Grupin L, ku do të përballet me Anglinë, Ganën dhe Panamanë. Me përvojën dhe karakterin që ka treguar në turnetë e mëdha, ajo do të hyjë në garë me besim për të shkuar sërish larg në fazën me eliminim direkt.

Në portë, Dominik Livaković pritet të jetë zgjedhja e parë. Portieri i Dinamo Zagrebit shkëlqeu në Botërorin 2022, ku u bë hero i Kroacisë me pritjet në penallti ndaj Japonisë dhe Brazilit, duke e ndihmuar skuadrën të arrinte deri në gjysmëfinale. Alternativat pas tij kanë më pak përvojë: Dominik Kotarski ka vetëm pak paraqitje me kombëtaren A, ndërsa Ivor Pandur ende nuk kishte debutuar në momentin e shpalljes së listës.

Në mbrojtje, Kroacia ka lojtarë me përvojë në kampionatet kryesore të Evropës. Emri më i spikatur është Joško Gvardiol, i cili pritet të luajë në krahun e majtë të mbrojtjes. Duje Ćaleta-Car dhe Josip Stanišić shtojnë siguri dhe përvojë në prapavijë.

Borna Sosa i Crystal Palace ka mbetur jashtë listës, ndërsa talenti i Tottenhamit, Luka Vušković, aktualisht i huazuar te Hamburgu, është përfshirë në skuadrën përfundimtare prej 26 lojtarësh.

Forca tradicionale e Kroacisë mbetet mesfusha. Edhe pse Marcelo Brozović dhe Ivan Rakitić nuk janë më pjesë e ekipit, Luka Modrić vazhdon të jetë pikë referimi. Dalić ka grumbulluar plot 10 mesfushorë, duke treguar qartë se kjo repart mbetet zemra e skuadrës.

Mario Pašalić ka bërë paraqitje të mira me Atalantan dhe pritet të ketë minuta të rëndësishme në Amerikën e Veriut. Po ashtu, Mateo Kovačić mbetet një emër kyç, pavarësisht një sezoni të ndikuar nga dëmtimet te Manchester City.

Sulmi është reparti ku Kroacia mund të ketë më shumë pikëpyetje. Ivan Perišić vazhdon të tregojë se mund të jetë vendimtar kur i jepet mundësia, por trajneri Dalić ka ndryshuar shpesh lojtarët në qendër të sulmit, pasi askush nuk e ka bërë plotësisht të vetin atë rol.

Ante Budimir mund të marrë vendin e titullarit për shkak të përvojës së tij, ndonëse nuk ka qenë shumë produktiv me fanellën e Kroacisë. E njëjta gjë vlen edhe për Petar Musan, Igor Matanovićin, Franjo Ivanovićin dhe Mislav Oršićin. Shumica prej tyre janë ende në zhvillim, me përjashtim të Oršićit, i cili në moshën 33-vjeçare është një nga lojtarët më me përvojë në skuadër.

Nëse Kroacia synon një tjetër rrugëtim surprizues drejt gjysmëfinales, do t’i duhet që yjet me përvojë të shfaqen sërish në nivelin më të lartë. Modrić, edhe pse 40-vjeçar, nuk ka treguar shenja rënieje në standardet e tij te Milan. Kovačić pritet të jetë partneri i tij kryesor në mesfushë dhe do të ketë rol të rëndësishëm në kontrollin e lojës.

Perišić është gjithmonë i rrezikshëm në Kupën e Botës, ndërsa Gvardiol do të ketë përgjegjësi të madhe për ta mbajtur mbrojtjen të qëndrueshme dhe për të qenë kërcënim në goditjet standarde. Në portë, Livaković do të jetë sërish një armë e madhe nëse Kroacia përfundon në penallti gjatë fazës me eliminim direkt.

Formacioni i Kroacisë duket mjaft i qartë në mbrojtje dhe mesfushë, por dilema kryesore mbetet sulmi. Dalić do të duhet të vendosë si t’i përshtatë të gjithë lojtarët qendrorë në një formacion funksional dhe kush do ta marrë përgjegjësinë kryesore për golat.

Formacioni i mundshëm i Kroacisë në Botërorin 2026, në sistemin 4-2-3-1:

Livaković; Gvardiol, Ćaleta-Car, Pongračić, Stanišić; Modrić, Kovačić; Pašalić, Kramarić, Perišić; Budimir.