Shkëndija U15 “shkatërron” Forca Vardarin, Ibrahim Luma krenar me paraqitjen e skuadrës

KF Shkëndija U15 ka zhvilluar një tjetër ndeshje fantastike në kampionat, duke mposhtur me rezultat bindës 4:0 skuadrën e Forca Vardar informon Tetovasot. Të besuarit e trajnerit Ibrahim Luma dominuan plotësisht sfidën, duke treguar lojë cilësore, ritëm të lartë dhe efikasitet para portës.
Gjithçka u vendos që në pjesën e parë, aty ku Kuq e Zinjtë realizuan gola të bukur dhe kontrolluan totalisht lojën. Serinë e golave e hapi talenti Leard Salihi me një supergol spektakolar, ndërsa epërsinë e dyfishoi Miran Emini me një goditje të saktë me kokë. Para pushimit realizoi edhe Drin Ademi për avantazhin e thellë të tetovarëve.
Në pjesën e dytë, Shkëndija vazhdoi me të njëjtin intensitet dhe nuk lejoi kundërshtarin të marrë frymë. Golin e katërt dhe të fundit e realizoi Rejan Saiti, duke vulosur një fitore të madhe dhe plotësisht të merituar.
Pas ndeshjes, trajneri Ibrahim Luma u shpreh i kënaqur me paraqitjen e skuadrës:
“Jam shumë i kënaqur me angazhimin dhe disiplinën e futbollistëve. Djemtë treguan karakter, cilësi dhe respektuan çdo detyrë taktike. Kjo fitore është rezultat i punës së vazhdueshme dhe përkushtimit në stërvitje. Më gëzon fakti që skuadra po rritet nga ndeshja në ndeshje.”TS