Ia panë sherrin largimit nga fusha, Senegalit i hiqet titulli i ACON-it, trofeu i shkon Marokut

Senegali është zhveshur nga titulli i Kupës së Kombeve të Afrikës 2025 dhe trofeu i është dhënë Marokut, siç është njoftuar nga Konfederata Afrikane e Futbollit (CAF).

Një vendim mjaft i jashtëzakonshëm i ka dhënë titullin Marokut, pasi finalja e 18 janarit 2026 u shndërrua në kaos në Rabat, Marok.

Dy muaj pas asaj finaleje të pabesueshme, Maroku është zyrtarisht kampion i Afrikës.

Pasi nikoqirët, Maroku, fituan një penallti në fund të kohës së rregullt, lojtarët e Senegalit u larguan nga fusha me mbështetjen e trajnerit të tyre. Ata më pas u kthyen në fushë dhe Brahim Diaz e humbi penalltinë, ndërsa ndeshja shkoi në vazhdime.

Senegali arriti ta fitojë ndeshjen 1-0 dhe u shpall kampion, por Maroku reagoi ashpër dhe paraqiti një ankesë zyrtare për rezultatin e ndeshjes.

Kjo ankesë u pranua dhe CAF vendosi se Senegali “konsiderohet se e ka humbur ndeshjen në tavolinë”, me rezultatin që tani regjistrohet si fitore 3-0 për Marokun.

Kjo do të thotë se Maroku tani është zyrtarisht kampion i Afrikës për herë të parë që nga viti 1976.

Ja vendimi zyrtar nga faqja e CAF dhe më poshtë deklarata e plotë:

“Bordi i Apelit i CAF vendosi që, në zbatim të Nenit 84 të Rregullores së Kupës së Kombeve të Afrikës (AFCON), Kombëtarja e Senegalit konsiderohet se ka humbur ndeshjen finale të TotalEnergies AFCON Maroku 2025 (“Ndeshja”), me rezultatin që regjistrohet 3–0 në favor të Federatës Mbretërore Marokene të Futbollit (FRMF).

Bordi i Apelit i Konfederatës Afrikane të Futbollit (“CAF”) vendosi sot që, në zbatim të Nenit 84 të Rregullores së AFCON, Kombëtarja e Senegalit konsiderohet se ka humbur finalen e TotalEnergies AFCON Maroku 2025 (“Ndeshja”), me rezultatin 3–0 në favor të FRMF.

Në ankesën e paraqitur nga FRMF lidhur me zbatimin e Neneve 82 dhe 84 të Rregullores së AFCON, Bordi i Apelit i CAF mori këto vendime:

“Ankesa e paraqitur nga Federata Mbretërore Marokene e Futbollit (FRMF) shpallet e pranueshme në aspektin formal dhe aprovohet.

Vendimi i Bordit Disiplinor të CAF anulohet.

Bordi i Apelit i CAF konstaton se sjellja e ekipit të Senegalit bie në fushëveprimin e Neneve 82 dhe 84 të Rregullores së AFCON.

Protesta e paraqitur nga FRMF aprovohet.

Deklarohet se Federata Senegaleze e Futbollit (FSF), përmes sjelljes së ekipit të saj, ka shkelur Nenin 82 të Rregullores së AFCON.

Në zbatim të Nenit 84 të Rregullores së AFCON, ekipi i Senegalit konsiderohet se ka humbur ndeshjen, me rezultatin 3–0 në favor të FRMF.

Të gjitha kërkesat e tjera refuzohen.”

Bordi i Apelit i CAF vendosi gjithashtu:

“Ankesa në lidhje me z. Ismaël Saibari (lojtari nr. 11 i Kombëtares së Marokut) pranohet pjesërisht.

Konfirmohet se Ismaël Saibari ka kryer shkelje disiplinore në kundërshtim me Nenet 82 dhe 83(1) të Kodit Disiplinor të CAF.

Dënimi ndaj tij ndryshohet në pezullim prej dy (2) ndeshjesh zyrtare të CAF, prej të cilave një (1) ndeshje është me kusht.

Gjoba prej 100,000 USD ndaj Ismaël Saibarit anulohet.

Ankesa në lidhje me incidentin me mbledhësit e topave pranohet pjesërisht.

Konfirmohet se FRMF mban përgjegjësi për sjelljen e mbledhësve të topave gjatë ndeshjes.

Gjoba ndaj FRMF për këtë incident ulet në 50,000 USD.

Ankesa për ndërhyrjen rreth zonës së rishikimit OFR/VAR refuzohet.

Gjoba prej 100,000 USD ndaj FRMF për këtë ndërhyrje mbetet në fuqi.

Ankesa për incidentin me lazer pranohet pjesërisht.

Gjoba ndaj FRMF për incidentin me lazer ulet në 10,000 USD.

Të gjitha kërkesat e tjera refuzohen”.