Mickoski: Inflacioni ka rënë nën 3%, duhet të bëjmë gjithçka që është në fuqinë tonë për të ruajtur stabilitetin e çmimeve

Kryetari i Qeverisë së Republika e Maqedonisë së Veriut, Hristijan Mickoski, sot duke iu përgjigjur pyetjes së gazetarëve lidhur me atë nëse Qeveria po e ndjek gjendjen me inflacionin dhe cili është qëndrimi për zhvillimet aktuale, deklaroi:

“Po, gjatë ditës së djeshme Enti Shtetëror i Statistikës i Maqedonisë së Veriut publikoi shpenzimet e jetesës për muajin shkurt 2026. Unë këtë e kam paralajmëruar disa herë në deklaratat e mia, por ja që dje u konfirmua se inflacioni ka rënë nën 3%, përkatësisht është 2,9%. Dhe përsëri është më i ulëti në rajon, do të thosha ndër më të ulëtit, nëse merret parasysh se në Greqi është 3%, në Bullgari është 3,5%, në Kosovë, të themi për muajin janar, për shkurt nuk ka të dhëna, është 5,8%, në Kroaci tashmë ka shkuar mbi 3,8%, në Sllovaki është 4%, ndërsa në Rumani është 9 e ca për qind. Kështu që të gjitha ato politika për të cilat kërkuam durim, ngadalë por me siguri po japin rezultat.

Pres që, pas atij takimi që do të kemi nesër me distributorët dhe me zinxhirët e marketeve, ta ruajmë këtë gjendje dhe ky trend të vazhdojë të ulet. Mendoj se nuk ka një sfidë më të madhe për të gjithë ne sesa të ruajmë standardin e qytetarëve.

Ndoshta nuk është mjaftueshëm, duke marrë parasysh kujtesën e keqe kolektive nga e kaluara, por ja që brenda jo më shumë se 2 vite u përpoqëm të stabilizohemi, të ngrihemi në këmbë, të arrijmë një gjendje neutrale, një zero, që më pas të mund të udhëheqim politika zhvillimi dhe politika ashtu siç meritojnë qytetarët. Të gjithë parametrat e ekonomisë tashmë e tregojnë këtë.

Nëse më pyetni për mendimin tim, mendoj se duhet të bëjmë gjithçka që është në fuqinë tonë për të ruajtur stabilitetin e çmimeve, duke pasur parasysh edhe faktin se çmimet me pakicë janë rritur 1,6%, që është nën 2%, 1,5%.

Këtu përfshihen ato çmime të ushqimeve të përpunuara, siç i quajnë, por edhe ushqimet normale, këtu janë perimet, frutat dhe të tjerat, si dhe shërbimet, të themi. Jam i kënaqur me gjendjen e inflacionit bazë, të cilin kemi arritur ta stabilizojmë, dhe tani duhet të vazhdojmë edhe më tej të lëvizim brenda kësaj shkalle. Mendoj se këtë vit do të lëvizim midis 2 dhe 3%, përveç nëse ndodh diçka e paparashikuar që nuk varet nga ne. Nëse ajo që ndodh në Gjirin zgjat, dhe nëse zgjat në drejtim që të shkaktojë pasoja për njerëzimin dhe botën, atëherë këto janë gjëra që nuk varen nga ne. Por, ajo që varet nga ne si Qeveri, ne e ndjekim, ndërmarrim masa, jemi proaktivë, e kontrollojmë dhe nuk lejojmë luhatje që do të ishin në dëm të qytetarëve”.