Aksion policor në Tetovë: Sekuestrohen dy vetura dhe një motoçikletë, arrestohen shoferë pa leje, mes tyre edhe një 15-vjeçar

Sektori për Punë të Brendshme (SPB) Tetovë, gjatë 24 orëve të fundit, ka realizuar disa aksione në kuadër të kontrolleve të qarkullimit rrugor, duke vënë në pranga tre persona që drejtonin mjetet pa leje drejtimi dhe duke sekuestruar automjetet e tyre.

Ndalimi i një 15-vjeçari me moped
Më datë 24.02.2026, rreth orës 10:00, në udhëkryqin e bulevardit “Ilindenska” me rrugën “Vidoe Smilevski Bato”, policia ka ndaluar një 15-vjeçar nga Tetova. Gjatë kontrollit u konstatua se i mituri po drejtonte një moped “Ing” pa pasur të drejtën e drejtimit të mjetit. Në prani të prindit dhe me udhëzim të Prokurorit Publik, me të miturin është kryer bisedë zyrtare, ndërsa mopedi është sekuestruar.

Arrestohet 24-vjeçari me “Audi”
Po në të njëjtën ditë, rreth orës 22:40, në udhëkryqin e bulevardit “Blagoja Toska” me rrugën “JNA”, zyrtarët policorë kanë privuar nga liria personin D.D. (24) nga fshati Gjermë. Ai u kap duke drejtuar një automjet “Audi” me targa të Tetovës pa pasur provim të dhënë për patentë shoferi. Automjeti i tij është konfiskuar nga policia.

Ndalimi i një 26-vjeçari në orët e para të mëngjesit
Së fundi, më datë 25.02.2026, rreth orës 01:40, në rrugën “Ilindenska”, policia ka arrestuar personin A.SH. (26) nga Tetova. Gjatë kontrollit të automjetit “Volkswagen Golf”, u vërtetua se 26-vjeçari po e drejtonte mjetin pa leje drejtimi. Ashtu si në rastet e mëparshme, edhe kjo makinë është sekuestruar.

Për të gjitha rastet, pasi të dokumentohen plotësisht, policia do të dorëzojë parashtresat përkatëse ligjore.