Milanka Rashiç: Danieli është mirë, por i duhet qetësi, policia ende po i kërkon rrëmbyesit

Milanka Rashiç, e cila është përgjegjëse për marrëdhënie me publikun për Daniel Kajmakoskin, njoftoi se ka folur me të pas natës së kaluar në stacionin e policisë. Ajo konfirmoi se këngëtari ishte rrëmbyer mbrëmë pranë “Beton Hala” në Beograd dhe se tani ndodhet në shtëpi, por ka nevojë për qetësi.

“Nga ajo që dëgjova nga Danieli në bisedën e shkurtër, më duket se është përballur shumë qetësisht dhe me guxim me rrëmbyesit. Tani i duhet qetësi dhe, në interes të hetimit policor, nuk do të japë deklarata,” tha Rashiç.

Ajo shtoi gjithashtu se policia është në kërkim të autorëve të panjohur, shtetas të huaj, të cilët e kishin lidhur dhe e kishin transportuar me makinën e tij, duke i kërkuar 20.000 euro.

Sipas informacioneve të deritanishme, rrëmbyesit po lëviznin në drejtim të Rumës, kur policia rrugore u përpoq ta ndalonte automjetin. Në përpjekje për t’u larguar, ata u përplasën me barrierën anësore të rrugës, dolën nga makina dhe u arratisën. Danieli u gjet i lidhur dhe më pas kaloi disa orë në stacionin e policisë, duke dhënë deklarata për ngjarjen.

Rashiç shprehu mirënjohje për të gjithë ata që janë telefonuar dhe janë shqetësuar për shëndetin dhe sigurinë e këngëtarit: “I falënderojmë nga zemra të gjithë njerëzit e mirë.”