Aksidenti tragjik në Nigeri mund ta mbajë Joshuan larg ringut për një kohë të gjatë

Anthony Joshua mund të kalojë një periudhë të konsiderueshme larg boksit pas aksidentit tragjik automobilistik në Nigeria që i mori jetën dy miqve të tij të ngushtë, Sina Ghami dhe Latif “Latz” Ayodele, dhe ku ai vetë u lëndua.

Shefi i Matchroom, Eddie Hearn, tha për Sky Sports se fokusi kryesor tani është t’i japin 36-vjeçarit hapësirën e nevojshme për të përballuar humbjen e dy pjesëtarëve të ekipit të tij:

“AJ gjithmonë ka qenë një djalë pozitiv dhe i guximshëm, por kjo është diçka shumë ndryshe. Ai do të ketë nevojë për kohën e tij – fizikisht, mendërisht, emocionalisht dhe shpirtërisht – përpara se të marrë një vendim mbi të ardhmen e tij në boks,” tha Hearn.

Hearn shtoi se Joshua do të dëshironte të kthehej në ring, por vendimi do të merret kur ai të ndjehet gati: “Kjo nuk është një bisedë që do ta kem me të tani. E vetmja gjë që pyesim është ‘A je mirë?’. Ajo që ndodhi është e tmerrshme dhe tronditëse për të gjithë.”

Joshua ishte në pushime në Nigeria pas fitores me nokaut në raundin e gjashtë ndaj Jake Paul në Miami më 19 dhjetor dhe spekulimet për një përballje me Tyson Fury u ngritën menjëherë.

Megjithatë, Hearn paralajmëron se bisedat për të ardhmen e tij janë të parakohshme: “Kur të vijë koha, ai do të marrë vendimin dhe do të dëgjoni vetëm nga ai.”