Rusia humbi 281 mijë ushtarë në vitin 2025

Rusia humbi 281 mijë trupa në vitin 2025

Projekti shtetëror i Ukrainës “Dua të jetoj”, ka publikuar ato që i quan statistika zyrtare të humbjeve ushtarake ruse për tetë muajt e parë të vitit 2025.

Sipas të dhënave të marra, Rusia humbi 281,550 ushtarë midis janarit dhe gushtit, duke përfshirë ata të vrarë, të plagosur dhe të zhdukur në aksion.

Raporti përshkruan shkallën e viktimave si të krahasueshme me humbjet sovjetike në ofensivat kryesore të Luftës së Dytë Botërore, transmeton Telegrafi.

Projekti “Dua të jetoj” u krijua nga drejtoria e inteligjencës e Ukrainës dhe synon të ndihmojë ushtarët rusë të dorëzohen në mënyrë të sigurt te Forcat e Armatosura të Ukrainës, dhe të shpëtojnë jetën e tyre.

Nga totali, 86,744 ushtarë rusë u vranë, përfshirë 1,583 oficerë dhe 8,633 të dënuar të rekrutuar nga burgjet. 33,966 të tjerë u listuan si të zhdukur, ndërsa 158,529 u plagosën dhe 2,311 u kapën nga forcat ukrainase.

Humbjet e pajisjeve ishin po aq të rënda: 13,145 njësi të shkatërruara përtej riparimit dhe 48,458 të tjera të dëmtuara, por potencialisht të riparueshme.

Mesatarisht, Rusia humbi 35,000 ushtarë dhe 7,700 pajisje çdo muaj, duke përfshirë 1,643 të shkatërruara në mënyrë të pakthyeshme.

“Çdo ditë, ushtria ruse humb mesatarisht një batalion në personel të vrarë dhe të zhdukur – 496 persona”, tha raporti, duke shtuar se shtatë brigada të plota shkatërrohen në mënyrë efektive çdo muaj.

Të dhënat zbulojnë një dështim kritik në evakuimin mjekësor në fushën e betejës: për çdo ushtar të vrarë, vetëm 1.3 raportohen të plagosur – një raport shumë më i keq se mesataret standarde ushtarake.

Projekti thotë se kjo tregon mungesën e trajnimit për mjekësi taktike dhe tendencën e njësive ruse për të braktisur të plagosurit në fushën e betejës.

“Gjeneralët modernë rusë kanë sakrifikuar pa qëllim 120,000 njerëz, por nuk kanë qenë në gjendje të kapin Pokrovskun për disa vite”, thanë autorët.