Nuk e bëri askush për 40 vjet – Fatmir Limani premton: Spitalin e Kërçovës do ta bëj unë

Gjatë një takimi me Forumin e Grave të Koalicionit VLEN në Kërçovë, kandidati për
kryetar komune, Fatmir Limani, ka dhënë një deklaratë të fuqishme dhe të
drejtpërdrejtë për një nga çështjet më të rëndësishme të qytetit: ndërtimin e
Spitalit të Kërçovës – një projekt që është zvarritur për më shumë se katër
dekada.
“Në 40 vjet, nuk e përmbylli dot askush. Asnjë president, asnjë ministër, asnjë
kryetar. Nuk e bëri Titoja, nuk e bëri Gligorovi, as Gruevski, as Aliu, as Zaevi, e as
Kovaçevski. Por atë do ta bëj unë, Fatmir Limani! Unë e kam mundësuar
buxhetin si ministër, unë do ta realizoj si kryetar komune. Në bashkëpunim me
qeverinë, spitali do të ndërtohet, dhe qytetarët e Kërçovës më në fund do të
kenë shëndetësi dinjitoze, jo premtime boshe,” u shpreh Limani.
Limani theksoi se ky projekt nuk është vetëm një premtim elektoral, por një
detyrim moral ndaj qytetarëve të Kërçovës. Në përmbyllje të fjalës së tij, ai u
shpreh:
“Keni besën time si hipotekën më të mirë për premtimet e mia. Keni emrin tim
si garanci.”
Ky premtim ka nxitur reagime të shumta pozitive në mesin e qytetarëve të cilët e
vlerësuan këtë si një hap konkret drejt përmirësimit të jetës në Kërçovë.