NATO nis misionin “Rojtari i Lindjes” kundër kërcënimit rus: Avionë dhe fregata për sigurinë e kufijve

NATO ka nisur zyrtarisht misionin e ri “Rojtari i Lindjes” për të forcuar sigurinë në kufirin lindor të Evropës përballë kërcënimit rus. Lajmi vjen nga kufiri me Bjellorusinë, ku avionë dhe helikopterë të Aleancës patrullojnë qiellin, ndërsa në terren vihet re një prani e kufizuar e trupave tokësore.

Operacioni i ri ka për qëllim mbrojtjen e hapësirës ajrore të Polonisë dhe vendeve baltike, pas valës së fundit të dronëve që hynë në hapësirën ajrore polake nga territori bjellorus.

Sekretari i Përgjithshëm i NATO-s, Jens Stoltenberg, nga Brukseli deklaroi se “veprimet e Moskës janë të papranueshme dhe nuk mund të tolerohet që dronët rusë të shkelin hapësirën ajrore të aleatëve”. Në krah të tij qëndronte gjenerali amerikan Alexus Grynkewich, komandant i forcave të SHBA-së në Evropë.

Forcat e para të përfshira në mision përfshijnë dy avionë luftarakë F-16 dhe një fregatë nga Holanda, tre Rafale francezë dhe katër Eurofighter gjermanë. Edhe pse prania është ende modeste, pritet që operacioni të zgjerohet.

Ndërkohë, Këshilli i Sigurimit i OKB-së u mblodh me kërkesë të Polonisë për të diskutuar krizën, ndërsa Varshava mbylli kufirin me Bjellorusinë duke akuzuar Moskën dhe Minskun për provokime të qëllimshme.

Moska mohon akuzat dhe pretendon se shkeljet e hapësirës ajrore kanë qenë “aksidentale”, një version që fillimisht u mbështet edhe nga Donald Trump, por më pas ai deklaroi se “durimi me Putinin po i mbaron shpejt”.

Ndërkohë, Rusia ka vijuar bombardimet ndaj rajonit të Sumy-t në Ukrainë, ndërsa Kievi ka goditur objekte energjetike ruse dhe një pjesë të flotës në Detin e Zi.