Bujar Osmani: Situata me FC “SHKUPI” një moment për të reflektuar
As nuk e mendoj të bëj fushatë politike me krenarinë tonë sportive, por pyetja që ngritet çdo ditë në çdo lagje të Shkupit është e dhimbshme, por e pashmangshme: A po shkon FC Shkupi drejt një kolapsi historik? Apo nga kjo krizë, do të rilindë një herë tjetër, më i fortë se kurrë!
Largimi i lojtarëve më të mirë, përplasjet në marrëdhëniet tifozë–udhëheqësi. Mohime, njoftime nga të gjitha palët, shumë premtime, por për fat të keq shumë pak vepra të realizuara, çojnë në përfundimin se diçka “nuk shkon” në Çair dhe se duhet të jemi të përgatitur edhe për më të keqen.
I shtyrë nga këto rrethana, dua të njoftoj opinionin sportdashës se unë si kandidat për kryetar komune të Çairit, një klub të madh me histori nuk mundem ta lë në udhëkryq pa zgjidhje.
Tashmë kam ngritur një grup profesional pune, i cili menjëher ka nisur shqyrtimin apo vlerësimin e gjendjes aktuale në klub.
Në fillim do ti përmend disa vendime që janë marë në të kaluarën dhe kanë ndikuar që të vijë kjo situatë e dhimbshme dhe në vijim do ti shpalosë disa pika drejt shpëtimit të FC SHKUPIT.
1.Sipas të dhënave, të publikuar në Gazetën Zyrtare 07/2016, me vendim të Qeverisë: Stadiumi i futbollit “Çair” – i është dhënë komunës në përdorim të përhershëm, por me kontrata rrjedhëse për përdorim nga ana e personave të tjerë juridikë paraprakisht të nënshkruara me Ndërmarrjen Publike për Ekonomizim me Objekte Sportive.
Unë si kryetar Komune do të inicojë që të krijohet një ekip i juristëve që ka për qëllim të jap mendimin për saktësinë, besueshmërine dhe ligjshmërinë për këto kontrata rrjedhëse dhe të zbardhet eventualisht ndonjë parregullsi e mundshme në dhënien e koncensionit të objekteve apo lokaleve, që gjinden në stadiumin e FC SHKUPI, të cilat si hapsira komerciale do të gjeneronin të ardhura të mira për klubin e futbollit SHKUPI.
2.Të bëhet vlerësimi i çështjeve proceduriale për kalimin e klubit në pronësi të drejtuesve të huaj!
-Të vërtetohet a ka pasur garanci apo dokument strategjik të miratuar që adreson çështjen e investimeve kapitale në të ardhmen apo zhvillimin e klubit nga momenti kur klubi zyrtarisht ka kaluar në pronësi të drejtuesve të huaj.
3.Borxhet e klubit po shtohen ditë pas dite dhe ky është shqetësimi më i madh i administratorëve të skuadrës së Shkupit.
FC SHKUPI burimin e të hyrave e ka pasur nga aksionarët dhe nga donatorët, por do ti përmend edhe format tjera të gjenerimit të të ardhurave financiare të konsiderueshme për klubin e FC Shkupit:
1.Nga Federata e Futbollit të Maqedonisë (FFM), për zhvillimin e akademisë. FFM -ja si institucion çdo vitë ka ndarë mjete financiare në arkën e FC Shkupit, gjithashtu dhe Shtëpia e futbollit europian, UEFA çdo vit ka ndarë një fond të solidaritetit për klubet e Ligës së parë të Maqedonisë
2. Mjete të mbledhura nga të drejtat televizive, reklamat dhe në rast të ndeshjeve evropiane, klubi i Futbollit Shkupi ka arkëtuar të hyra nga UEFA.
Që nga viti 2018/19 deri në 2023/24, FC Shkupi ka luajtur gjashtë vite radhazi në Evropë.
Nga ndeshjet evropiane vlen të ceket se përfituesi më i madh nga ekipet e ligës së parë të Maqedonisë së Verout mbetet ekipi kampion, që edhe në rastin më të keq, duke i humbur të gjitha përballje në ndeshjet evropiane, i ka të sigurta më së paku 810 mijë euro.
Ndërsa, ka pasur raste kur në këto ndeshje evropiane, FC Shkupi ka luajtur ndaj 3 skuadrave evropiane. Që nëse llogaritet në mjete financiare i bie se vetëm gjatë një viti janë arkëtuar gjithsej 1.2milion € nga ndeshjet e luajtuara në kompeticionet evropiane.
3. Shuma të mëdha në arkën e klubit kan hyrë edhe me transferimin apo shitjen e lojtarëve.
Do ti përmendim vetëm (5) pesë futbollist që kan sjellur mjete financiare në arkën e klubit të futbollit Shkupi edhe atë plotë 3.250.000€:
1.Dembo Darboe në të cilën klubi i FC SHKUPIT fitoi plotë 800.000 euro me transferimin te kampionët e Bjellorusisë, Shakhtar Soligorsk.
2.Futbollisti Renaldo Cephas është transferuar tek klubi Ankaragücü plotë 1.200.000,
3.Lojtari tjetër që ka sjellë mjete financiare të mira për klubin është Lamine Diack 500.000€ me kalimin e tij tek klubi Tuzlaspor.
4.Gjithashtu dhe futbollisti Serginho është transferuar për shumën 500.000 € tek skuadra Giresunspor.
5.Marin Jurina në Hungari te skuadra FC MEZÖKÖVESD ka sjellur plotë 250.000 € dhe shum futbollistë të tjerë gjithashtu kanë ndihmuar klubin e FC SHKUPIT duke sjellur mjete të mira financiare në arkën e klubit futbollistik Shkupi gjatë kalimit të tyre nëpër skuadra të ndryshme.
•Gjithashtu, klubi i futbollit Shkupi është ndihmuar edhe nga qeveria nëpërmjet Agjensionit për Rini dhe Sport duke aplikuar në vauçerët sportiv të dikurshme, ndërsa tani me qeverinë e re ndihmohet shum pak, me mjete minimale simbolike që qeveria i jep nga buxheti i saj si subvencione nga Ministria e Sportit
•FC SHKUPI ka një përparësi për nga klubet tjera që veprojnë, pasi që nuk është e kufizuar vetëm në territorin e një komune. Duke qenë klubi i qytetetit, FC SHKUPI ka tifozë në tërë territorin e Shkupit, si Saraji me rrethinë, Hasanbeg, Haraçinë, Butel, Çair. Kjo e bënë FC Shkupi një kompani serioze duke ju ofruar klientëve të saj mundësi për të reklamuar biznesin e tyre.
•Për momentin FC SHKUPI nuk mund ti luajë ndeshjet në shtëpi deri në plotësimin e kritereve të kërkuara për licencë të sistemit VAR në stadiumin e Çairit!
•Që klubi të gjejë pronar apo sponzor stabil me marrëveshje të mirëfilltë, fillimisht me udhëheqësinë aktuale duhet të themelohet një kryesi teknike e përkohshme për daljen nga situata:
1.Përmes një përzgjedhjeje sa më objektive, me pjesëmarrjen e drejtuesve më të lartë të komunës, këshillit komunal, opinionit sportiv, përfaqësues nga tifo grupi i Shvercerave dhe anëtarë të udheheqisë aktuale të FC Shkupit.
Komuna të bëj procesin e planifikimit të nevojave për personel: Rëndësia e ndarjes së duhur të detyrave dhe përhapja e kontrollit.
Përveç presidentit të përkoshëm dhe drejtorit sportiv, të funksionojë në mënyrë të mirëfilltë edhe hierarkia e klubit:
1.Sektori Administrativ & Ligjor
2.Sektori i Financave
3.Sektori Mbeshtetës
4.Sektori për Marketing dhe PR
5.Sektor përgjegjës të Sigurisë
6.Sektori i Trajnereve
Paratë e investuara në projekt duhet të përkthehen në aksione, me një çmim të arsyeshëm dhe real me tregun në vendin tonë, duke pasur në konsideratë faktin se 10% e aksioneve të klubit duhet t’i takojnë Komunës, pjesa tjetër 90% duhet të jetë e shpërndarë mes investitorit apo investitorëve.
Komuna duhet të derdhë në arkën e klubit përqindjen e saj detyruese, ashtu sikur investitorët.
Klubi duhet të drejtohet nga një bord ekzekutiv, duke iu përmbajtur përqindjes së shpërndarjes. Komuna do të zë 10 % e saj, sipas nënshkrimit të kontratës. Drejtuesi i këtij bordi duhet të jetë financuesi më i madh, si rrjedhojë ai që zotëron edhe përqindjet më të mëdha në klub, i cili njëherazi shpallet president i klubit.
Gjithashtu do të promovojë këtë projekt te kompanitë e suksesshme shqiptare dhe do ti nxisë që ata të bëjnë investime në projektin afatgjatë të klubit Shkupi.
2.Kur jemi te zhvillimi i klubit është shumë e nevojshme edhe investimi në kuadrot e reja, në shkollën e futbollit të FC SHKUPIT.
Ekipet zinxhirë duhet të jenë nismëtarët e këtij projekti serioz, nga këtu fillon ndërtimi i klubit.
Trajnuesit e gjeneratave të reja, pra akademisë, duhet të përmbushin një sërë kriteresh, të cilat duhet të hartohen që në nisje të projektit. Kriteri kryesor duhet të jetë integriteti moral i trajnerëve.
Sot vetëm brenda akademisë së Shkupit ka më tepër se 300 fëmijë që stërviten.
FC SHKUPI do të bashkëpunojë edhe me klubet vëllazërore që gjinden në qytetin e Shkupit si psh: KF Fortuna Hasanbeg, KF Shkëndija e Haraçinës, KF Besa Saraj etj.
Gjithashtu edhe brenda Komunës së Çairit ka shum shoqata sportive apo akademi sportive që stërvisin fëmijë në sportin e futbollit si (KF Skupi , KF Albion , KF Besiktas -Çair, KF Dream Team KF Albarsa, KF Tefejuz). Të gjitha këto klube në forma të ndryshme duhet të ndihmohen dhe të bashkëpunojnë në mënyrë që të krijohet një rrjet i mir për selektimin e talentëve që gjinden nëpër lagjet e Shkupit.
Me sjelljen e investitorëve do të bëj përpjekje dhe të gjej mundësitë që klubi i FC Shkupit të kthehet në një nga skuadrat më të forta të futbollit vendor, me ambicien për të rikthyer lavdinë e dikurshme dhe për të forcuar identitetin e tij në elitë.