Shkëndija U-15 mposht Dardanët në një miqësore të bukur para fillimit të kampionatit

Një ndeshje e bukur e grupmoshave U-15 mes Dardanëve dhe Shkëndijës përfundoi me rezultat 1:3 në favor të kuqezinjve. Të dyja skuadrat zhvilluan një përballje të fortë dhe të bukur, ku u pa qartë përparimi i futbollistëve të rinj në këtë fazë të përgatitjeve para nisjes së kampionatit të ri.

Trajnerët Lamush Ibraimi (Dardanët) dhe Ibraim Luma (Shkëndija) u shprehën të kënaqur me paraqitjen e futbollistëve.

Trajneri i Shkëndijës, Ibraim Luma, i cili po udhëheq me sukses këtë gjeneratë të re, theksoi se ekipi ka ende punë për të bërë, por loja e treguar në fushë ka dhënë shenja shumë pozitive. “Skuadra reagoi mirë, si titullarët, ashtu edhe lojtarët që u aktivizuan në pjesën e dytë. Po shohim ngritje të nivelit dhe kjo na motivon për sezonin e ri”, u shpreh ai.

Nga ana tjetër, edhe Dardanët treguan një lojë dinjitoze, duke dëshmuar se posedojnë një potencial të madh në këtë gjeneratë. Vlen të përmendet se disa lojtarë që sot mbrojtën ngjyrat e Shkëndijës, hapat e parë në futboll i kanë hedhur pikërisht te Dardanët, gjë që i jep kësaj miqësoreje edhe më shumë simbolikë.