Nikolloski njoftoi riparimin e plotë të hekurudhës Shkup-Kërçovë, do të kushtojë rreth 4 milionë euro për kilometër

Hekurudha nga Shkupi në Kërçovë do të rikonstruktohet plotësisht, dhe sipas planit, ndërtimi duhet të përfundojë brenda dy deri në dy vjet e gjysmë, njoftoi zëvendëskryeministri dhe ministri i Transportit Aleksandar Nikolloski në konferencën e sotme për shtyp në Qeveri.

Ai tha se ky projekt do të mundësojë lidhjen e kryeqytetit me disa qytete në pjesën perëndimore të vendit, dhe linja do të ndërtohet përgjatë rrugës ekzistuese, që në fakt do të thotë se shteti nuk do të ketë kosto shtesë për shpronësim, ose probleme pronësore dhe ligjore, të cilat zakonisht ngadalësojnë dinamikën e punës.

“Së pari do ta rindërtojmë hekurudhën, pastaj do të instalojmë sinjalistikë moderne dhe do ta elektrifikojmë atë. Edhe nëse do të ishte në gjendje të mirë, në këtë linjë do të funksiononin vetëm lokomotivat me naftë”, tha Nikoloski.

Për fillim, Bashkimi Evropian do të sigurojë një grant prej 5.3 milionë eurosh për përgatitjen e një studimi fizibiliteti, dhe institucioni kryesor financiar do të jetë Banka Evropiane për Rindërtim dhe Zhvillim (BERZH), e cila do të zgjedhë një konsulent. Pas përfundimit të studimit, do të fillojë faza e dytë – puna në terren. Nikolloski tha se hekurudha tani është në gjendje jashtëzakonisht të keqe dhe aktualisht është e pamundur që trenat të qarkullojnë në të. Sipas tij, do të duhen rreth dy deri në dy vjet e gjysmë nga përfundimi i studimit për një rindërtim të plotë.

“Ndërtimi do të zgjasë rreth dy deri në 2.5 vjet dhe do të fillojë menjëherë pas përfundimit të procedurave të BERZH-it. Hekurudha do të jetë krejtësisht e re, por falë faktit që po përdorim rrugën ekzistuese, po shmangim vonesat dhe kostot shtesë”, tha ministri i Transportit.

Nikolloski tha gjithashtu se çmimi tregues, të paktën sipas llogaritjeve fillestare, do të kushtonte rreth 4 milionë euro për kilometër dhe se ata do të përdorin të gjitha mundësitë për të siguruar financim të favorshëm, siç bëjnë me hekurudhën me shpejtësi të lartë dhe hekurudhën për në Bullgari.