Inxhinierët e ardhshëm në detyrat e tyre të para të punës në Ministrinë e Energjetikës – Bozhinovska viziton studentët në pozicionet e tyre të praktikës

Studentët nga Fakulteti i inxhinierisë elektrike dhe teknologjive të informacionit (FEIT) kanë
filluar praktikën studentore në Ministrinë e Energjetikës minierave dhe burimeve minerale. Ata
tashmë janë ndarë në sektorë dhe kanë filluar punën praktike brenda Ministrisë dhe organeve të
saj.
Ministrja Sanja Bozhinovska sot vizitoi praktikuesit e rinj në pozicionet e tyre, gjatë së cilës u
njoh personalisht me angazhimet e tyre, detyrat që u janë caktuar dhe fushat në të cilat janë të
përfshirë.
“Është krenari të shohësh energjinë dhe motivimin që këta të rinj sjellin me vete. Që nga dita e
parë, ata nuk janë aty vetëm si vëzhgues – ata janë të përfshirë në mënyrë aktive në procese
konkrete, duke përgatitur materiale, duke hulumtuar dhe diskutuar. Kjo është gjenerata e re që ne
duam ta mbajmë në vend dhe t’i japim mundësinë të zhvillohet këtu – në institucionet ku
ndërtohen politikat publike”, theksoi ministrja Bozhinovska.
Duke folur para studentëve, ministrja dha një mesazh mbështetjeje dhe inkurajimi: “Ne kemi
nevojë për njerëz që kuptojnë teknologjinë, energjinë dhe sfidat moderne. Por edhe më shumë se
kaq, ne kemi nevojë për njerëz që duan të bëjnë një ndryshim. Ju nuk jeni këtu vetëm për të
mësuar, por edhe për të sjellë një perspektivë të re. Ne do t’ju mbështesim në çdo hap të rrugës.”
Studentët shpërndahen sipas ekspertizës së tyre në departamentet për energjetikë, burime të
rinovueshme, efikasitet energjetik, burimeve minerale, planifikimit strategjik dhe digjitalizimit.
Me ta punojnë mentorë nga radhët e administratës, në mënyrë që të fitojnë një pasqyrë reale të
funksionimit të institucionit dhe një rol aktiv në detyrat e vazhdueshme.
Programi realizohet në bazë të Memorandumit të bashkëpunimit ndërmjet Ministrisë dhe FEIT-it,
si pjesë e angazhimit për të mbështetur inxhinierët e rinj dhe përfshirjen e tyre në zhvillimin e
politikave energjetike. Ministria njofton vazhdimin dhe zgjerimin e këtij programi në të ardhmen,
me qëllim krijimin e vazhdimësisë në ndërtimin e stafit ekspert të brendshëm dhe sigurimin e
brezave të ekspertëve të gatshëm për të udhëhequr tranzicionin energjetik.