Man United eliminohet nga Liga e Kampionëve, Bayerni vazhdon tutje si lider
Manchester United është eliminuar nga Liga e Kampionëve, derisa Bayern Munichi ka siguruar kalimin në raundin e 16-të të kësaj gare.
Skuadra e drejtuar nga Thomas Tuchel shënoi fitore minimale sonte ndaj skuadrës së Erik ten Hag, në ndeshjen e gjashtë dhe të fundit në Grupin A.
Ndeshja e zhvilluar në stadiumin “Old Trafford” përfundoi me rezultatin 0:1.
Golin e vetëm dhe të tri pikëve për kampionët e Gjermanisë e shënoi Kingsley Coman (70’).
Bayern Munichi pas kësaj fitore ka 16 pikë dhe tutje kalon si lider i grupit, me një bilanc prej pesë fitoreve dhe një barazimi.
Manchester United eliminohet nga garat evropiane, duke mos arritur që të vazhdojë së paku në Ligën e Evropës.
“Djajtë e Kuq” pozicionohen të fundit në grup me vetëm 4 pikë dhe me një bilanc prej katër humbjeve, një barazimi dhe një fitoreje.
Nga Grupi A tutje ka kaluar edhe Copenhagen, kurse Galatasaray do të vazhdojë në Ligën e Evropës.