Juventusi njoftohet me humbjen e parë në Serie A

Juventusi ka humbur me rezultat 4-2 nga Sassuolo në xhiron e pestë të Serie A. Kjo është humbja e parë për Bardhezinjtë në Serie A dhe vjen pas tri fitoreve dhe një barazimi. Lauriente (12’), Berardi (41’),  Pinamonti (82’) dhe Gatti (autogol 90+5’)  shënuan golat për Sassuolon. Vina (autogol 21’) dhe Chiesa (78’) shënuan golat për Juventusin

Sassuolo është klubi i parë që ia ka shkaktuar humbjen Juventusit këtë sezon në Serie A, e ku vendasit kanë fituar me rezultat 4-2.

Goli i parë erdhi për shkak se Szczesny gaboi.

Portieri polak nuk arriti që të priste një goditje të fortë të Lauriente e cila nga duart i kalojë në mes të këmbëve e ku Sassuolo kaloi në epërsi.

Juventusi u kthye shpejt në lojë.

Një krosim i mirë në zonë nga Chiesa bëri që Vina të shënoi autogol në minutën e 21-të dhe Juventusi erdhi të barazimi i rezultatit.

Por, kur u mendua që pjesa e parë do të përfundonte me këtë rezultat, atëherë në skenë doli Berardi që pasi mori një top të mirë nga Henrique hyri në zonë dhe goditja e tij përfundoi në këndin e majtë të portierit Szczesny në minutën e 41-të te ndeshjes.

Në minutën e 44-të u mendua që Juventusi fitoi penallti por ishte VAR që qartësoi se Tressoldi nuk e ka prekur topin me dorë.

Për penallti u ankua edhe Sassuolo në minutën e 59-të por prapë ishte VAR ai që qartësojë edhe këtë situatë.

Vlahovic i Juventusit pati një mundësi të mirë për të barazuar në minutën e 65-të por që goditja e serbit nuk ishte fare e saktë.

Minuta e 78-të shënoi barazimin e kësaj ndeshje nga Juventusi. I riu Fagioli pasoi të Chiesa që shënoi golin e barazimit për Juventusin.

Katër minuta zgjati ky barazim.

Kjo për shkak se Sassuolo doli shpejt në sulm dhe arriti që të shënonte golin e tretë me anë të Andrea Pinamontit.

Juventusi i humbi shpresat për një barazim kur në minutën e 5 shtesë të pjesës së dytë u shënua goli i katërt. Gatti do të shënonte autogol dhe Sassuolo kështu arkëtoi tri pikë kundër Juventusit me rezultat 4-2, tri pikë që bën ata të jenë në vendin e 11 me 6 pikë. Juventusi përkundër humbjes mbetet në vendin e katër me 10 pikë.

Ndeshja e radhës për Sassuolon është ajo kundër Interit në mesjavë. Juventusi pritet që të luan në shtëpi kundër Lecces ndeshje e cila po ashtu do të zhvillohet në mesjavë.