Reagimi epik i Messit pasi mori një “dhuratë” lidhet me Mbappen, tifozët besojnë se ai u tall me francezin

Lionel Messi pati një reagim qesharak kur iu dorëzua ajo që dukej si një breshkë “Teenage Mutant Ninja Turtles” gjatë paradës së Kombëtares së Argjentinës në vendin e tyre.

Dhe, tifozët po supozojnë se kjo ishte një referencë për shokun e skuadrës së argjentinasit te Paris Saint-Germaini, Kylian Mbappe, të cilin e mposhti në finalen e Kupës së Botës “Katar 2022”.

Messi dhe shokët e tij të skuadrës mbërritën në Argjentinë të hënën për të parakaluar trofeun e Kupës së Botës për herë të parë para tifozëve, me disa prej tyre që zgjodhën të hidhnin dhurata drejt autobusit të hapur ku ndodhej ekipi argjentinas.

Një të tillë e kapi 35-vjeçari, që pastaj shpërtheu në të qeshur. Më pas, ai e ktheu sërish atë në turmë.

Por, për çfarë bëhet fjalë? – Sipas “Sportbible”, tifozët në internet besojnë se ishte “Michelangelo” nga “Teenage Mutant Ninja Turtles”, të cilën e kishte mbajtur Mbappe.

Kujtojmë se raportime të shumta ishin bërë për raportet mes Messit dhe Mbappes, që thuhet se nuk janë të mira.