Alonso pas transferimit te Barcelona: Është shumë e veçantë të luash për skuadrën në të cilën fitoi babai im

Marcos Alonso ishte një nga dy lojtarët që iu bashkuan Barcelonës në ditën e fundit, së bashku me Hector Bellerin.

Ndërsa ky i fundit është shprehur i lumtur pas kthimit në Camp Nou pas 11 vitesh, edhe Alonso së fundmi ka dhënë përshtypjet e tij për kalimin te Barcelona, transmeton Klankosova.tv.

Ish-mbrojtësi i Chelseat thotë se është gati të nisë kapitullin e ri të karrierës së tij në Camp Nou dhe dëshiron të shkojë në rrugën e suksesit të babait të tij, i cili gjithashtu kishte luajtur për Barcelonën në të kaluarën.

“Tani më në fund jam këtu. Jam shumë i lumtur dhe mezi pres të filloj. E vetmja skuadër që ishte në kokën time ishte Barça. Kjo është faza tjetër e karrierës sime dhe mezi pres”, tha Alonso pasi iu bashkua Barçës.

Mbrojtësi i majtë po vjen pas një periudhe gjashtëvjeçare te Chelsea që e pa atë të bënte më shumë se 200 paraqitje, ndërsa fitoi Ligën e Kampionëve, UEFA Europa League dhe titullin e Premier League.

“Është shumë e veçantë të luash për ekipin ku babai im pati një sukses të tillë. Kjo është një arsye tjetër e rëndësishme për të qenë këtu. Më kujtohet kur më solli për të parë ndeshjet në Camp Nou, kështu që të jem këtu tani është e pabesueshme.”

Alonso vazhdoi të zbulojë bisedimet e tij me trajnerin Xavi Hernandez, ndikimi i të cilit luajti një rol kyç në lehtësimin e lëvizjes së tij në Camp Nou.

“Kam pasur disa fjalë me trajnerin. Unë dua të bëj atë që ai dëshiron nga unë dhe atë që i nevojitet skuadrës. Unë kam përvojë dhe dua t’ia ofroj atë skuadrës”, tha Alonso.

“Unë njoh shumë lojtarë që kanë luajtur për Spanjën ose sepse janë shokë të vjetër të skuadrës. Mezi pres t’i shoh dhe të ndaj dhomën e zhveshjes me ta”, shtoi ai.