“Po tjerrin kontrollimet e materialeve, s’janë vigjilentë” – Avokati i Thaçit indinjohet me Prokurorinë

Avokati i ish-presidentit Thaçi, Gregory Keohe, ka fajësuar Prokurorinë e Speciales për vonesa të tejskajshme në nxjerrjen e materialeve.

Keohe në seancën e sotme ka thënë se vigjilenca, është fjalë që nuk i përshtatet Prokurorisë në punën e saj, shkruan lajmi.net

Ai ka kërkuar që materialet sipas rregullës 103 të nxjerren menjëherë.

“Ndoshta prokurori s’është i njohur për procedurat e deritanishme. Ne kemi gjashtë muaj që flasim për materiale që duhet të nxirren. Vigjilenca është fjalë që nuk është etiketimi i duhur për të përshkruar prokurorinë në këtë aspekt. Materialet sipas rregullës 103 duhet të dorëzohen menjëherë, dhe kjo do të thotë tani. Fjala menjëherë, do të thotë tani. Kështu që të bësh tjerrje të kontrollimeve që duhet të nxjerren sipas rregullës 103 është e pavlerë. Kur ZPS-ja vendoset në një pozitë të vështirë, atëherë ata dorëzojnë materialin shfajësues. Kjo është çështje që është problem i prokurorisë”, tha Keohe.

“Ky është një proces që duhet bërë, dhe duhet bërë sa më shpejtë që të jetë e mundur”, shtoi ai.