Nuk kishte leje pune, Zvicra e gjobit dhe dëbon qytetarin e Kosovës

Gjatë një kontrolli të trafikut, policia ka kapur një person, i cili, me gjithë ndalimin që kishte për të hyrë në Zvicër po qëndronte ne shtetin helvetik dhe po punonte në skele (ndërtimtari) pa leje pune. Ai është arrestuar, gjobitur dhe dëbuar.

Në mbrëmjen e së hënës (27.06.2022), një patrullë policie në komunën Cham të Kantonit të Zug-ut ka ndaluar një furgon transporti dhe me atë rast ka kontrolluar tre personat që ndodheshin aty, transmeton albinfo. Policia ka zbuluar se njëri prej tyre kishte një ndalim hyrjeje në Zvicër që ishte i vlefshëm deri më 30 korrik 2024.

27-vjeçari kosovar megjithatë ka hyrë në Zvicër më 4 qershor 2022 me tren nga Italia. Ai ka deklaruar gjithashtu se kishte punuar si punëtor në skele, pa pasur lejen e detyrueshme të punës, shkruan policia e Kantonit të Zugut në një komunikatë të saj.

Ai u arrestua dhe u dënua me gjobë nga gjyqtari me procedurë të shkurtër i prokurorisë publike të kantonit Zug për shkelje të rregulloreve të hyrjes, qëndrim të paligjshëm të qëllimshëm në Zvicër dhe punësim të paautorizuar.

Më tutje atë e ka dëbuar nga Zvicra Zyra e Migracionit e Kantonit të Zugut. Më saktë ai është depërtuar në vendin e tij, Kosovë, të premten e kaluar (1 korrik 2022).

Ndalimi i hyrjes për Zvicrën dhe vendet e Shengenit është zgjatur edhe për dy vjet, deri në fund të korrikut të vitit 2026.

Punëdhënësi i tij jashtë kantonit është gjithashtu përgjegjës. Ai akuzohet për shkelje të ligjit për të huajt dhe integrimin.