Luis Enrique dhe pesë lojtarë i vazhdojnë kontratat me PSG-në

Paris Saint-Germain njoftoi zyrtarisht të premten se ka rinovuar kontratat me trajnerin e saj, Luis Enrique, dhe pesë lojtarë, përpara fillimit të ndeshjes së madhe ndaj Monacos.

Pasi kishte hyrë në vitin e fundit të kontratës së tij në fillim të sezonit 2026/27, trajneri spanjoll tani është i lidhur me PSG-në deri në vitin 2030.

Shpërblimi është mëse i merituar për Enriquen, i cili është shndërruar në një legjendë të klubit duke e udhëhequr skuadrën drejt dy titujve të parë të Championsit në historinë e saj.

Lojtarët kryesorë në dy sezonet e fundit të suksesshme të “Kuqebluve”, Fabián Ruiz (30 vjeç), Willian Pacho (24) dhe João Neves (21), do të vazhdojnë gjithashtu aventurën e tyre në Paris edhe në vitet e ardhshme.

Ruiz ka rinovuar kontratën deri në vitin 2028, ndërsa Pacho dhe Neves kanë zgjatur marrëveshjet e tyre deri në vitin 2031.

Edhe pse janë lojtarë zëvendësues, Senny Mayulu (20) dhe Lucas Beraldo (22) janë gjithashtu pjesëtarë të rëndësishëm të skuadrës së PSG-së dhe kanë vendosur të ardhmen e tyre te kampionët në fuqi të Francës.

Të dy kanë rinovuar kontratat deri në vitin 2031.