Labinot Rexha rrëfen incidentin në Rahovec: “U sulmova unë, nëna dhe mbesa ime”

Gazeta Express08/09/2026 14:57
Këngëtari dhe ish-banori i “Big Brother VIP Kosova”, Labinot Rexha, ka folur për një incident të ndodhur mëngjesin e sotëm në Rahovec, duke pretenduar se ai dhe disa anëtarë të familjes së tij janë sulmuar fizikisht dhe verbalisht.

Në një lidhje telefonike për “Prive By Liberta Spahiu”, Rexha tha se ngjarja lidhet me një kontest pronësor prej 16 metrash katrorë me fqinjët e tij.

Sipas këngëtarit, mosmarrëveshja ka histori të hershme dhe lidhet me një hapësirë që, sipas tij, ishte lënë për një rrugë të përbashkët që nga periudha para luftës.

Rexha: Mora një goditje dhe u përballa me fyerje të rënda

Këngëtari tregoi se incidenti ndodhi në momentin kur po largohej nga shtëpia për të shkuar në një dasmë në Prizren.

“Që në mëngjes jam zgjuar për me shku në dasmë, pasi kam një dasmë në Prizren. Duke dalë nga shtëpia, jemi në proces gjyqësor për një kontest prej 16 metrash katrorë”, tha Rexha.

Sipas tij, situata u përshkallëzua dhe përfundoi në përplasje fizike.

“Mora një goditje, një boks, si dhe fyerje e sharje shumë të rënda, të cilat nuk i kam përjetuar kurrë më parë”, deklaroi ai.

Pretendon se u sulmuan edhe nëna dhe mbesa e tij

Rexha pretendoi se incidenti nuk u kufizua vetëm te ai, por se në përplasje u përfshinë edhe anëtarë të familjes së tij.

“Nëna ime është sulmuar sot nga tre persona dhe dy gra. Pres nga Prokuroria që ata të mos lirohen, sepse është sulmuar edhe vajza e xhaxhait tim”, tha këngëtari.

Ai kërkoi që rasti të trajtohet nga organet kompetente dhe që përgjegjësitë të përcaktohen përmes procedurave ligjore.

Konflikti lidhet me një kontest pronësor

Sipas versionit të dhënë nga Rexha, mosmarrëveshja për pronën daton prej vitesh dhe aktualisht është duke u trajtuar edhe në gjykatë.

Këngëtari tha se familja e tij dhe pala tjetër kishin pasur më herët një marrëveshje lidhur me një rrugë të përbashkët, por çështja tashmë është shndërruar në kontest juridik.

Deri në publikimin e këtij lajmi, nuk ka pasur një reagim publik nga pala tjetër lidhur me pretendimet e Labinot Rexhës.

Për këtë arsye, rrethanat e plota të incidentit mbeten për t’u sqaruar nga policia, prokuroria dhe organet e tjera kompetente