Izraeli pretendon se ka shkatërruar bazën e madhe nëntokësore të Hezbollahut (VIDEO)

Ushtria izraelite ka deklaruar se ka shkatërruar një kompleks të madh nëntokësor të Hezbollahut në jug të Libanit, pas përdorimit të më shumë se 1,000 tonë eksplozivë.

Sipas Forcave të Mbrojtjes së Izraelit (IDF), bëhet fjalë për dy tunele me gjatësi totale mbi 2 kilometra, të shtrira nën kreshtën Ali Taher. Shpërthimi shkaktoi aktivitet sizmik të barabartë me një tërmet me magnitudë 4.1, sipas Shërbimit Gjeologjik të SHBA-së.

IDF tha se kompleksi përfshinte një qendër komandimi të përdorur nga njësia “Badr” e Hezbollahut, si dhe dhjetëra raketa, predha, dronë, armë antitank, mina dhe eksplozivë.

Ushtria izraelite pretendon se infrastruktura ishte ndërtuar gjatë dy dekadave dhe se ishte financuar e planifikuar nga Irani. Sipas saj, personat që ndodheshin brenda kompleksit janë vrarë ose janë larguar.

Izraeli tha se operacioni përfundoi një mision për shkatërrimin e tetë tuneleve në këtë zonë dhe krijimin e një të ashtuquajture “zone sigurie” pranë kufirit.

Hezbollahu dhe qeveria libaneze nuk kanë reaguar menjëherë ndaj deklaratave izraelite. Operacioni vjen në një periudhë kur luftimet në jug të Libanit janë intensifikuar dhe forcat izraelite kanë zgjeruar aktivitetin e tyre kundër pozicioneve të Hezbollahut.