“E godita vetëm një herë me shpullë”, zbardhet dëshmia e Jozit për rastin me Edin

Gjykata në Tiranë ka vendosur masën e sigurisë “arrest në shtëpi” për këngëtarin Jozefin Marku dhe shoferin e tij, Kristjan Nikollin, të arrestuar në lidhje me sulmin ndaj Eduard Kuçit.

Siç raporton Top Channel, në dëshminë e tij, Marku është mbrojtur duke u shprehur “se ka qenë veprim gjaknxehtësie dhe se Kuçi i ka sharë familjen”.

“Kërkoj ndjesë për veprimin. E kam kryer në gjaknxehtësi e sipër. Nuk e njihja më parë Eduard Kuçin. E kam njohur në rrjetet sociale, ku më ka sharë familjen. E kam goditur vetëm një herë me shpullë, duke i thënë të më kërkojë falje që më ka sharë familjen”, mësohet të jetë shprehur Marku.

Ndërsa, shoferi i tij, Nikolli ka deklaruar se nuk ka qenë i pranishëm në vendngjarje. Për municionin që i kanë gjetur në banesë, Nikolli ka deklaruar se “ishte i ndryshkur dhe në kushte të papërdorshme”.

“Unë atë natë që ka ndodhur ngjarja kam qenë në një dasmë, nuk kam qenë prezent në vendngjarje. Unë Jozin e kam mik, këtë e dinë të gjithë. Fishekët që keni gjetur në shtëpinë time ishin të ndryshkur, nuk e di përse ishin aty”, ka dëshmuar Kristjan Nikolli.