A gaboi Liverpooli me Kelleherin? Alisson drejt largimit dhe “Reds” përballë dilemës së madhe për portën

Liverpooli pritet të ketë nevojë për një portier të ri titullar në vitin 2027, kur Alisson Becker mund t’i japë fund aventurës së tij në “Anfield” si futbollist i lirë.

Por, a e kishte klubi pasardhësin ideal të brazilianit brenda skuadrës dhe e lejoi të largohej?

Ish-mbrojtësi i Liverpoolit, Stephen Warnock, beson se Caoimhin Kelleher mund të kishte qenë zgjidhja e duhur për të trashëguar fanellën e titullarit nga Alisson.

Nëntë vite të paharrueshme për Alissonin në “Anfield”

Përpara ardhjes së Alissonit, Liverpooli kishte kaluar disa sezone duke kërkuar stabilitet në portë, ndërsa Jurgen Klopp po ndërtonte skuadrën që më vonë do të fitonte trofetë më të mëdhenj.

Portieri brazilian mbërriti nga Roma në verën e vitit 2018 për rreth 67 milionë funte, duke u bërë për një periudhë të shkurtër portieri më i shtrenjtë në botë.

Investimi rezultoi jashtëzakonisht i suksesshëm.

Alisson ka regjistruar mbi 330 paraqitje me Liverpoolin, madje duke shënuar edhe një gol të paharrueshëm, ndërsa në palmaresin e tij me klubin përfshihen tituj të Ligës Premier dhe triumfi në Ligën e Kampionëve.

Liverpooli ka aktivizuar opsionin për zgjatjen e kontratës së tij edhe për 12 muaj, por deri tani nuk është arritur marrëveshje e re. Kjo do të thotë se, pas përfundimit të sezonit aktual, Alisson mund të largohet nga “Anfield” si futbollist i lirë.

Zëvendësimi i tij nuk pritet të jetë aspak i lehtë.

Giorgi Mamardashvili vazhdon të konsiderohet një alternativë për portën, ndërsa 18-vjeçari Lucca Brughmans, i cili do t’i bashkohet Liverpoolit nga Genku, mbetet një talent ende relativisht i paprovuar në nivelin më të lartë.

Warnock: Zëvendësimi i Alissonit do të jetë shumë i vështirë

Stephen Warnock pranon se Liverpooli do të përballet me një sfidë të madhe kur të vijë momenti për të gjetur pasardhësin e brazilianit.

“Ka shumë futbollistë për të cilët thuhet se është shumë e vështirë të zëvendësohen, por në fund gjithmonë gjendet një zëvendësues. Mund të mos jetë i njëjti tip lojtari, por mund të ketë një ndikim tjetër në skuadër”, deklaroi Warnock për “GOAL”.

Sipas tij, kur Alisson mbërriti në Angli, shumë njerëz nuk e njihnin plotësisht potencialin e tij.

“Kur erdhi Alisson, ishte disi i panjohur për shumë njerëz në Angli. Nuk kishte luajtur aq shumë te Roma dhe, kur mbërriti, të gjithë u habitën se si asnjë klub tjetër nuk e kishte transferuar më parë.”

Warnock veçoi aftësinë e brazilianit me topin në këmbë dhe efikasitetin në situatat një kundër një.

“Statistikat e Liverpoolit kur ai luan, krahasuar me ndeshjet kur mungon, janë të jashtëzakonshme. Prandaj mendoj se gjetja e një zëvendësuesi do të jetë shumë e vështirë.”

A duhej Liverpooli ta mbante Kelleherin?

Warnock beson se Liverpooli mund ta kishte pasur tashmë brenda klubit portierin e aftë për ta zëvendësuar Alissonin.

Caoimhin Kelleher u largua nga “Reds” në vitin 2025 për t’iu bashkuar Brentfordit, pasi kërkonte të luante rregullisht si titullar.

“Mendoja se Liverpooli kishte një zëvendësues të përshtatshëm te Kelleher. Më pëlqen shumë si portier dhe ajo që përfaqëson”, tha Warnock.

“Ai kaloi pesë apo gjashtë vjet pranë Alissonit dhe mësoi shumë prej tij. Mund t’i shohësh disa nga karakteristikat e Alissonit edhe në lojën e tij: qetësinë, sjelljen në fushë dhe aftësinë në situatat një kundër një.”

Megjithatë, Kelleher nuk dëshironte të vazhdonte të priste mundësinë e tij.

“Ai donte të luante rregullisht dhe nuk ishte më i gatshëm të priste. Kjo është plotësisht e kuptueshme”, shtoi Warnock.

Dyshime për Mamardashvilin

Liverpooli ka në dispozicion edhe Giorgi Mamardashvilin, por Warnock mendon se portieri gjeorgjian ende duhet të përmirësohet në disa aspekte të rëndësishme për stilin e lojës së “Reds”.

“Për momentin, ai nuk është mjaftueshëm i mirë me topin, qoftë me këmbë apo me duar. Është transferuar për cilësitë e tij si portier dhe për pritjet, por kjo nënkupton një mënyrë tjetër loje”, deklaroi ish-mbrojtësi.

“Kur je Liverpooli dhe pritet ta dominojë posedimin, portieri duhet të jetë i mirë edhe me këmbë. Duhet të jetë në gjendje t’i nisë aksionet. Mendoj se Mamardashvili ende nuk është në atë nivel.”

Liverpooli ka investuar gjithashtu te 18-vjeçari Lucca Brughmans nga Genku.

Sipas Warnock, bëhet fjalë për një investim me rrezik të konsiderueshëm, duke marrë parasysh eksperiencën e kufizuar të portierit të ri.

“Është një bast i madh të shpenzosh 35 milionë funte për një portier që ka luajtur vetëm 12 ndeshje. Por, padyshim, ata kanë parë diçka të veçantë tek ai.”

Liverpooli kërkon rikthimin te trofetë

Alisson do të synojë ta përfundojë aventurën e tij me Liverpoolin në mënyrën më të mirë të mundshme.

“Reds” po kërkojnë rikthimin te trofetë pas sezonit 2025/26 pa asnjë titull, rezultat që përfundimisht i kushtoi Arne Slotit vendin e trajnerit.

Tashmë skuadra drejtohet nga Andoni Iraola, ndërsa Liverpooli e ka nisur sezonin 2026/27 me dy barazime radhazi 2-2, ndaj Newcastle Unitedit dhe Nottingham Forestit.

Mundësia e radhës për fitoren e parë do të vijë të premten, kur Liverpooli do të udhëtojë për t’u përballur me Ipswich Townin e sapopromovuar.