Tërmet në merkato: Gjiganti saudit nis bisedimet për Harry Kane

Një prej transferimeve më të bujshme të verës mund të jetë në përgatitje, pasi Al-Hilal ka hapur bisedime direkte për transferimin e kapitenit të Anglisë, Harry Kane.

Gjiganti saudit Al-Hilal ka nisur kontaktet me përfaqësuesit e Harry Kane, me synimin për ta bindur sulmuesin e Bayern Munichut që të transferohet në Saudi Pro League gjatë këtij afati kalimtar.

Sipas mediumit anglez “TEAMtalk”, kapiteni i Kombëtares së Anglisë është vendosur në krye të listës së dëshirave të Al-Hilalit për përforcimin e repartit ofensiv.

Raporti pretendon se Charlie Kane, vëllai dhe njëkohësisht agjenti kryesor i futbollistit, është takuar gjatë fundjavës me Simon Francis, drejtorin teknik të futbollit të Al-Hilalit.

Francis aktualisht ndodhet në Angli, ku po punon për hartimin e listës së sulmuesve që klubi saudit synon të transferojë.

Al-Hilal planifikon revolucion në sulm

Interesimi për Kane është pjesë e një projekti më të gjerë të Al-Hilalit për rindërtimin e repartit ofensiv.

Klubi tashmë ka siguruar transferimin e Crysencio Summerville nga West Ham United, por drejtuesit kërkojnë edhe një sulmues krahu dhe një qendërsulmues të ri.

Harry Kane konsiderohet objektivi kryesor për pozitën e sulmuesit, megjithëse Al-Hilal po shqyrton edhe disa alternativa të tjera.

Për krahët e sulmit, në listën e klubit raportohet se ndodhen emra si Savinho dhe Pedro Neto.

Bayern nuk dëshiron ta humbasë Kane

Nga ana tjetër, Bayern Munich nuk ka ndërmend të heqë dorë lehtë nga sulmuesi anglez.

Kontrata aktuale e Kane po hyn në vitin e saj të fundit, ndërsa drejtuesit e klubit gjerman duan t’i ofrojnë atij një marrëveshje të re trevjeçare, e cila do ta mbante në Mynih deri në qershor të vitit 2029.

Kjo do të thotë se Al-Hilal duhet jo vetëm ta bindë vetë futbollistin për një aventurë në Arabinë Saudite, por edhe të gjejë një marrëveshje me Bayernin.

Ndryshime të mëdha te Al-Hilal

Reparti ofensiv i Al-Hilalit pritet të pësojë disa ndryshime të rëndësishme gjatë kësaj vere.

Karim Benzema mund të largohet nga skuadra, ndërsa Darwin Nunez raportohet se është shumë pranë një transferimi në formë huazimi te Trabzonspor.

Nëse Al-Hilal arrin ta bindë Harry Kane të largohet nga Bayern Munich, transferimi i kapitenit të Anglisë në Arabinë Saudite do të ishte pa dyshim një prej lëvizjeve më sensacionale të këtij afati kalimtar.