Siljanovska-Davkova në Taranto me mbështetje për delegacionin më të madh maqedonas në Lojërat Mesdhetare

Maqedonia do të marrë pjesë me delegacionin më të madh deri më tani në Lojërat Mesdhetare, ndërsa presidentja Gordana Siljanovska-Davkova ka udhëtuar drejt qytetit italian Taranto për t’u dhënë mbështetje sportistëve maqedonas.

Maqedonia në edicionin e 20-të të Lojërave Mesdhetare “Taranto 2026” do të përfaqësohet nga 88 sportistë në 19 nga gjithsej 33 sporte që janë në programin e garave.

Delegacioni maqedonas ka arritur dje në qytetin pritës, ndërsa sot në Fshatin Olimpik presidentja Siljanovska-Davkova është takuar me përfaqësuesit e Maqedonisë, është njohur me anëtarët e delegacionit dhe u ka përcjellë mbështetje para fillimit të garave.

Ajo u ka uruar sportistëve paraqitje të suksesshme dhe ka shprehur bindjen se me përkushtim, luftë dhe shpirt sportiv do t’i përfaqësojnë denjësisht ngjyrat maqedonase në Taranto.

Prania e presidentes në Lojërat Mesdhetare konsiderohet një moment historik për sportin maqedonas, pasi për herë të parë që nga pjesëmarrja e Maqedonisë në këtë ngjarje të madhe ndërkombëtare sportive, një president i shtetit merr pjesë në këtë eveniment.

Siljanovska-Davkova do të qëndrojë dy ditë në Taranto, ndërsa sonte do të marrë pjesë edhe në ceremoninë zyrtare të hapjes së Lojërave, së bashku me delegacionet e vendeve mesdhetare.

Ceremonia e hapjes do të zhvillohet sonte në orën 20:00 dhe publiku maqedonas do të mund ta ndjekë drejtpërdrejt përmes MRT 1, ndërsa një pjesë e garave do të transmetohen në MRT 3.

Lojërat “Taranto 2026” do të zgjasin deri më 3 shtator. Sportistët maqedonas tashmë kanë nisur paraqitjet e para, ndërsa volejbollistet maqedonase kanë zhvilluar ndeshjen e parë kundër Turqisë, ku pësuan humbje me rezultat 3:0.

Në ditët në vijim, Maqedonia do të garojë në atletikë, badminton, boks, çiklizëm, sporte kalorësie, skermë, gjimnastikë ritmike, xhudo, karate, qitje, not, taekwondo, tenis, triatlon dhe mundje, ndërsa do të përfaqësohet edhe në sportet ekipore me ekipin e femrave në hendboll dhe volejboll, ekipin e meshkujve në basketboll 3×3 dhe reprezentacionin U21 në futboll.

Delegacioni maqedonas në Taranto përbëhet nga gjithsej 130 anëtarë, prej të cilëve 88 janë sportistë. Përgatitjet dhe pjesëmarrjen i ka mbështetur Komiteti Olimpik Maqedonas, ndërsa sportistët do të kenë edhe mbështetje në aspektin e përgatitjes mentale përmes punës me trajnere të performancës mentale.

Kjo është pjesëmarrja e katërt e Maqedonisë si shtet i pavarur në Lojërat Mesdhetare, pas Mersinit 2013, Tarragonës 2018 dhe Oranit 2022. Deri tani, Maqedonia ka fituar 14 medalje në këtë garë ndërkombëtare.Tetovasot