Raketa e SpaceX drejt përplasjes me Hënën, ja çfarë pritet të ndodhë më 5 gusht

Një pjesë e raketës Falcon 9 të kompanisë SpaceX pritet të përplaset me sipërfaqen e Hënës të mërkurën, në një ngjarje të rrallë që ka tërhequr vëmendjen e astronomëve në mbarë botën.

Sipas Qendrës së NASA-s për Studime të Objekteve Pranë Tokës (CNEOS), faza e sipërme e raketës do të godasë sipërfaqen hënore më 5 gusht, pasi ka udhëtuar me një shpejtësi prej rreth 2.43 kilometrash në sekondë, ose rreth 5.400 milje në orë.

NASA ka arritur në këtë përfundim pasi astronomë të pavarur analizuan të dhëna publike dhe zbuluan se një pjesë e raketës, e cila u lëshua në janar të vitit 2025, ndodhet në një trajektore të pakontrolluar drejt Hënës.

Agjencia amerikane e hapësirës ka bërë të ditur se përplasja nuk paraqet asnjë rrezik për Tokën. NASA do të vazhdojë monitorimin e objektit dhe më pas do të analizojë vendin e impaktit për qëllime shkencore.

Raketa Falcon 9 ishte përdorur në një mision amerikan-japonez për të transportuar dy anije uljeje hënore dhe pajisje kërkimore në sipërfaqen e Hënës. Ndërsa një pjesë e raketës është projektuar për t’u rikthyer në Tokë dhe për t’u ripërdorur, pjesë të tjera mbeten në hapësirë dhe mund të përfundojnë duke u përplasur me trupa të tjerë qiellorë.

Përplasja pritet të ndodhë rreth orës 02:35 sipas kohës lindore të SHBA-së (06:35 GMT) dhe pritet të krijojë një re të madhe pluhuri hënor, e cila mund të ngrihet dhjetëra kilometra mbi sipërfaqen e Hënës.

Astronomi i Universitetit të Kembrixhit, Matt Bothwell, ka thënë se mungesa e atmosferës dhe graviteti më i dobët i Hënës do ta bëjnë këtë impakt shumë më spektakolar sesa një përplasje e ngjashme në Tokë.

Sipas shkencëtarëve, mbeturinat e krijuara nga përplasja mund të arrijnë rreth një milion kilogramë, ndërsa një pjesë e tyre mund të shpërndahet në hapësirë për shkak të kushteve unike të sipërfaqes hënore.