Pesë skuadrat me fillimin më të vështirë në Premier League, Arsenalin e pret një seri sfiduese

Sezoni 2026/27 i Premier League do të nisë të premten, më 21 gusht, kur kampioni në fuqi, Arsenal, pret Coventry City në “Emirates Stadium”.

Si çdo fillim sezoni, optimizmi është i madh, por kalendari nuk është treguar njësoj bujar me të gjitha skuadrat. Disa klube do të përballen me një seri ndeshjesh shumë të vështira që para pushimit të parë për kombëtaret, çka mund të ndikojë që herët në ambiciet për titull, Evropë apo mbijetesë.

Këto janë pesë skuadrat që, në letër, kanë shortin më të komplikuar në javët e para.

5. Arsenal

Kampionët në fuqi ndoshta do të kishin preferuar një nisje më të lehtë në mbrojtje të titullit, por në Premier League rrallë ka ndeshje të sigurta.

Arsenal e nis sezonin në shtëpi ndaj Coventry City, një takim ku londinezët do të jenë favoritë të qartë. Megjithatë, Coventry vjen me entuziazmin e promovimit dhe me besimin e krijuar pas sezonit të kaluar.

Më pas, skuadra e Mikel Artetës udhëton te Aston Villa, ku sezonin e kaluar pësoi humbje pas një goli të vonshëm të Emi Buendia-s.

Pas kësaj vjen derbi londinez ndaj Chelsea-t në Emirates, përpara një udhëtimi në Sunderland, një stadium ku Arsenal arriti të merrte vetëm një pikë sezonin e kaluar.

Ndeshja e fundit para pushimit ndërkombëtar do të jetë një tjetër transfertë e vështirë, këtë herë ndaj Brighton & Hove Albion.

Ndeshjet: Coventry, Aston Villa, Chelsea, Sunderland, Brighton.

4. Coventry City

Coventry rikthehet në Premier League pas 25 vjetësh, pasi kishte rënë nga elita në vitin 2001.

Skuadra e Frank Lampard vështirë se mund të kishte kërkuar një debutim më të komplikuar, pasi do ta nisë sezonin në transfertë ndaj kampionit Arsenal.

Në javën e dytë Coventry pret Hull City, një ndeshje që, edhe pse shumë herët në sezon, mund të ketë peshë të madhe në luftën për mbijetesë.

Më pas vjen një udhëtim shumë i vështirë në “Etihad Stadium” ndaj Manchester City-t.

Coventry do të presë më pas Brightonin, përpara se ta mbyllë ciklin e parë të ndeshjeve me një transfertë ndaj Nottingham Forest.

Ndeshjet: Arsenal, Hull City, Manchester City, Brighton, Nottingham Forest.

3. Hull City

Hull City u rikthye në Premier League përmes “play-off”-it dhe hyn në sezon si një nga skuadrat që parashikohet të luftojnë për mbijetesë.

Për tifozët e “Tigers”, një fillim i mirë mund të jetë vendimtar. Kujtimet e sezonit të fundit në elitë tregojnë sa e vështirë është të rikuperosh pikët e humbura në muajt e parë.

Skuadra e Sergej Jakirovic do ta nisë sezonin në shtëpi ndaj Manchester United.

Më pas vjen transferta ndaj Coventry City, përpara se Hull të presë kampionët e Europa League, Aston Villa.

Sfida tjetër është edhe më e komplikuar: një udhëtim në “Stamford Bridge” për t’u përballur me Chelsea-n e Xabi Alonso-s.

Përpara pushimit ndërkombëtar, Hull do të udhëtojë edhe në “St James’ Park” për të luajtur ndaj Newcastle United.

Ndeshjet: Manchester United, Coventry, Aston Villa, Chelsea, Newcastle.

2. Newcastle United

Newcastle gjithashtu ka përpara një fillim të vështirë, veçanërisht pasi klubi po hyn në një epokë të re pas largimit të Eddie Howe gjatë fazës përgatitore.

Trajneri i ri Matthias Jaissle duhet të përshtatet shpejt, në një verë kur Newcastle ka humbur disa prej emrave kryesorë, përfshirë Sandro Tonali dhe Anthony Gordon.

Ndeshja e parë e Jaissle në drejtimin e skuadrës do të jetë në shtëpi ndaj Liverpool-it, një kundërshtar ndaj të cilit Newcastle ka pasur shumë vështirësi në Premier League. Fitorja e fundit e Newcastle ndaj Liverpool-it në kampionat daton nga dhjetori i vitit 2015.

Më pas vjen transferta ndaj një Tottenham-i të rindërtuar pas investimeve të mëdha të verës.

Në javët pasuese, Newcastle pret Bournemouth, udhëton në “Elland Road” ndaj Leeds United dhe më pas pret skuadrën e sapopromovuar Hull City.

Ndeshja ndaj Hull mund të duket më e lehtë në letër, por pas një kalendari kaq të ngjeshur, nënvlerësimi i kundërshtarit mund të rezultojë i kushtueshëm.

Ndeshjet: Liverpool, Tottenham, Bournemouth, Leeds United, Hull City.

1. Fulham

Në letër, Fulham mund të ketë kalendarin më të vështirë nga të gjitha skuadrat në fillim të sezonit.

Klubi po nis gjithashtu një kapitull të ri me trajnerin spanjoll Alvaro Arbeloa, i cili zëvendësoi Marco Silva-n pas largimit të këtij të fundit drejt Benfica-s.

Arbeloa po punon për t’ua përshtatur lojtarëve filozofinë e tij, por kalendari nuk i jep shumë kohë për eksperimentim.

Fulham e nis sezonin me derbin e Londrës Perëndimore ndaj Chelsea-t në “Craven Cottage”.

Më pas vjen një transfertë ndaj Sunderland-it në “Stadium of Light”, ku vendasit ishin jashtëzakonisht të fortë sezonin e kaluar.

Në javën e tretë, Fulham pret një tjetër rival londinez, Crystal Palace.

Pas kësaj vjen ndoshta sfida më e vështirë e këtij cikli: transferta në “Anfield” kundër Liverpool-it.

Dhe sikur kjo të mos mjaftonte, ndeshja e fundit para pushimit ndërkombëtar do të jetë në shtëpi ndaj Manchester United.

Fulham nuk e ka mposhtur Unitedin në “Craven Cottage” në Premier League që nga dhjetori i vitit 2009.

Ndeshjet: Chelsea, Sunderland, Crystal Palace, Liverpool, Manchester United.

Në një kampionat ku një fillim i mirë mund të përcaktojë ritmin e gjithë sezonit, këto pesë skuadra do të jenë nën presion që nga java e parë. Për Arsenalin sfida është mbrojtja e titullit, ndërsa për Coventry-n dhe Hull-in çdo pikë e hershme mund të ketë rëndësi të madhe në betejën për mbijetesë.