Irani: Bisedimet me Omanin për Hormuzin përparojnë në mënyrë “konstruktive”
Irani tha sot se negociatat me Omanin në lidhje me tranzitin përmes Ngushticës së Hormuzit po përparojnë “të qetë dhe konstruktivisht”, transmeton Anadolu.
“Është arritur mirëkuptim në lidhje me trafikun e anijeve dhe konsultimet po vazhdojnë për të finalizuar disa pika teknike në deklaratën e përbashkët”, tha zëdhënësi i Ministrisë së Jashtme, Esmaeil Baqaei në një konferencë për media, siç citohet nga agjencia gjysmë zyrtare e lajmeve Tasnim.
Ai tha se do të krijohen mekanizma për të garantuar trafikun detar të sigurt, për të mbrojtur mjedisin dhe për të adresuar “krimet detare”. “Po ashtu është theksuar se për ofrimin e shërbimeve detare për mjetet lundruese ngarkohen kostot dhe tarifat përkatëse”, shtoi ai.
Baqaei tha se objektivi kryesor i bisedimeve në vazhdim midis Teheranit dhe Muskatit “është arritja e një mirëkuptimi të qëndrueshëm që siguron siguri të plotë në ngushticë”.
“Diskutimet me Omanin janë vetëm një proces dypalësh për të përcaktuar rrugën e sigurt të transportit ndërkombëtar dhe nuk ka të bëjë me dallimet politike”, shtoi ai.
Baqaei pohoi se Ngushtica e Hormuzit nuk do të rihapet derisa Washingtoni të përmbushë kërkesat e Teheranit, përfshirë fundin e bllokadës detare të porteve iraniane. Vërejtjet vijnë pasi negociatat për të ardhmen e lundrimit përmes Ngushticës së Hormuzit mbeten në një bllokim.
Irani dhe SHBA-ja nënshkruan memorandum mirëkuptimi në qershor përmes ndërmjetësimit të Pakistanit dhe Katarit, duke i dhënë fund armiqësive aktive dhe duke nisur negociatat drejt një marrëveshjeje më të gjerë. Memorandumi parashikon rivendosje graduale të lundrimit tregtar përmes Ngushticës së Hormuzit, por zbatimi më vonë ngeci pasi të dyja palët shkëmbyen akuza për shkeljen e kushteve të tij.
Gjatë konferencës, Baqaei tha se një vendim përfundimtar mbi përbërjen dhe nivelin e delegacionit të Iranit në takimin e Asamblesë së Përgjithshme të OKB-së në shtator nuk është marrë ende dhe do të shpallet në javët e ardhshme.
